(បរទេស)៖ ក្រុមហ៊ុនផលិតរថយន្តជប៉ុន Honda ប្រកាសប្រមូលរថយន្តចំនួន ២៥៩,០៣៣ គ្រឿងនៅសហរដ្ឋអាមេរិក ដោយសារបញ្ហាឈ្នាន់ហ្វ្រាំងដែលអាចបណ្ដាលឱ្យមានគ្រោះថ្នាក់។ នេះបើតាមការឱ្យដឹងពីរដ្ឋបាលសុវត្ថិភាពចរាចរណ៍ផ្លូវគោកជាតិ (NHTSA) របស់សហរដ្ឋអាមេរិក និងត្រូវបានចុះផ្សាយដោយ CNA នៅថ្ងៃទី១៨ ខែមិថុនា ឆ្នាំ២០២៥។
NHTSA បានឱ្យដឹងថា បញ្ហានេះប៉ះពាល់ដល់រថយន្តម៉ូដែល Acura TLX ស៊េរីឆ្នាំ ២០២១ ដល់ ២០២៥, ម៉ូដែល Acura MDX ស៊េរីឆ្នាំ ២០២៣ ដល់ ២០២៥ និង Honda Pilot ស៊េរីឆ្នាំ ២០២៣ ដល់ ២០២៥។ ក្រុមហ៊ុន Honda បានបញ្ជាក់ថា ខ្លួនបានទទួលរបាយការណ៍ទាមទារសំណងក្រោមការធានា (warranty claims) ចំនួន ៦៧៤ ករណី ចាប់តាំងពីឆ្នាំ ២០២០ មក ដែលទាក់ទងនឹងបញ្ហាឈ្នាន់ហ្វ្រាំងនេះ ប៉ុន្តែមិនទាន់មានរបាយការណ៍ពីគ្រោះថ្នាក់ ឬរបួសណាមួយឡើយ។
គួរជម្រាបថា Honda បានអំពាវនាវដល់ម្ចាស់រថយន្តដែលរងផលប៉ះពាល់ទាំងអស់ ឱ្យទាក់ទងទៅកាន់ភ្នាក់ងារលក់របស់ក្រុមហ៊ុនដើម្បីទទួលបានការជួសជុលដោយឥតគិតថ្លៃ៕
