(បរទេស)៖ ក្រុមហ៊ុនទូរគមនាគមន៍អាមេរិក T-Mobile បានប្រកាសថាខ្លួននឹងចាប់ផ្ដើមដាក់ឱ្យដំណើរការសេវាទិន្នន័យតាមបណ្តាញផ្កាយរណបទៅទូរសព្ទដៃ (satellite-to-cell network) ដែលដំណើរការដោយ Starlink របស់ក្រុមហ៊ុន SpaceX នៅដើមខែតុលា។ ការប្រកាសនេះធ្វើឡើងបន្ទាប់ពីមានអតិថិជនជាង ១,៨ លាននាក់បានចុះឈ្មោះប្រើប្រាស់សេវាសាកល្បងនេះតាំងពីចុងឆ្នាំ ២០២៤ រួមទាំងអតិថិជនរាប់សែននាក់មកពី AT&T និង Verizon ផងដែរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៤ ខែមិថុនា ឆ្នាំ២០២៥។
សេវាកម្មនេះ ត្រូវបានគេស្គាល់ថាជា T-Mobile Starlink ឬ T-Satellite មានគោលបំណងលុបបំបាត់តំបន់ «គ្មានរបារ» (មានន័យថា គ្មានការរឹតបន្តឹង ឬរារាំង) ដោយអនុញ្ញាតឱ្យទូរស័ព្ទនោះភ្ជាប់ទៅផ្កាយរណប Starlink ស្វ័យប្រវត្តិនៅពេលដែលពួកគេបាត់បង់ការតភ្ជាប់អ៊ីនធឺណិត។ ពោលគឺវា នឹងប្រែក្លាយពីទូរស័ព្ទធម្មតា ទៅជាទូរស័ព្ទផ្កាយរណប ខណៈមិនចាំបាច់ត្រូវការ hardware បន្ថែម។
សេវា T-Satellite នឹងចាប់ផ្ដើមដំណើរការជាផ្លូវការនៅថ្ងៃទី ២៣ ខែកក្កដាខាងមុខនេះ សម្រាប់ការផ្ញើសារ SMS, MMS, រូបភាព និងសំឡេងខ្លីៗ។ ចំណែកឯសេវាទិន្នន័យសម្រាប់កម្មវិធីនានានឹងត្រូវដាក់ឱ្យដំណើរការនៅថ្ងៃទី ១ ខែតុលា។ ជាមួយនឹងផ្កាយរណប Starlink ជាង ៦៥៧ គ្រឿង T-Mobile មានបំណងលុបបំបាត់តំបន់អត់សេវា និងពង្រីកការតភ្ជាប់ទៅកាន់តំបន់ដែលអង់តែនទូរសព្ទធម្មតាមិនអាចទៅដល់នៅសហរដ្ឋអាមេរិក។
យោងតាមលោក Mike Katz ប្រធានផ្នែកទីផ្សាររបស់ T-Mobile បានបញ្ជាក់ថា ការចុះឈ្មោះប្រើប្រាស់ភាគច្រើនបានកើតឡើងបន្ទាប់ពីក្រុមហ៊ុនបានផ្សាយពាណិជ្ជកម្មក្នុងព្រឹត្តិការណ៍ Super Bowl ហើយការប្រើប្រាស់សេវាសាកល្បងនេះមានតុល្យភាពល្អទាំងនៅទីក្រុងធំៗ និងតំបន់ជនបទ។
គួរជម្រាបថា សេវា T-Satellite នឹងត្រូវបានបញ្ចូលដោយឥតគិតថ្លៃបន្ថែមក្នុងគម្រោង «Experience Beyond» ថ្មីរបស់ T-Mobile រីឯអតិថិជនផ្សេងទៀតដូចជា AT&T និង Verizon គឺអាចប្រើប្រាស់បានក្នុងតម្លៃ ១០ ដុល្លារក្នុងមួយខែ។ T-Mobile រំពឹងថានឹងមានកម្មវិធីជាច្រើនទៀតដែលអាចប្រើប្រាស់តាមផ្កាយរណបបាននាពេលអនាគត រួមមាន AccuWeather, AllTrails, Apple, Google, WhatsApp និង X ជាដើម៕
