(កែប)៖ ប៉េង ហួត គ្រុប សហការជាមួយមន្ទីរបរិស្ថាន និងសហគមន៍នេសាទភូមិកែបរៀបចំកម្មវិធី CSR ដាំកូនកោងកាងចំនួន ៥.០០០ដើម ក្រោមប្រធានបទ «ឫសនៃនិរន្តភាព កាលពីព្រឹកថ្ងៃទី២០ ខែមិថុនា ឆ្នាំ២០២៥ ស្ថិតនៅសហគមន៍នេសាទភូមិកែប សង្កាត់កែប ក្រុងកែប ខេត្តកែប ដែលមានសហការី ប៉េង ហួត គ្រុប មន្រ្តីបរិស្ថាន និងបងប្អូនប្រជាសហគមន៍នេសាទភូមិកែបសរុបប្រមាណជាង ១០០នាក់ចូលរួម។
កម្មវិធីដាំដើមកោងកាងនេះ គឺជាចំណែកមួយនៃក្របខណ្ឌការងារសង្គមរបស់ ប៉េង ហួត គ្រុប ពោលគឺ «ការអប់រំ បរិស្ថាន សង្គម» គោលបំណងនៃកម្មវីធីបរិស្ថាននេះ គឺជាការលើកកម្ពស់និរន្តរភាពបៃតង ការអភិរក្សប្រព័ន្ធអេកូឡូស៊ីព្រៃកោងកាង និងដើម្បីឆ្លើយតបទៅនឹងបញ្ហាប្រែប្រួលអាកាសធាតុ ខណៈបច្ចុប្បន្ននេះពិភពលោកកំពុងតែប្រឈមការកើនឡើងកម្ដៅ។ ជាមួយគ្នានេះក៏ជាការរួមចំណែកលើកកម្ពស់ទាំងសេដ្ឋកិច្ចសហគមន៍ និងតំបន់ទេសចរណ៍នៅក្នុងភូមិសាស្រ្តខេត្តកែបផងដែរ។
ព្រៃកោងកាងគឺជាប្រភពធនធានធម្មជាតិដ៏មានសារៈសំខាន់ និងអត្ថប្រយោជន៍ជាច្រើន។ វាគឺជាតំបន់ទ្រនាប់រវាងដីគោក និងសមុទ្រ ទប់នឹងបញ្ហាធ្ងន់ធ្ងរនៃការហូរច្រោះតាមឆ្នេរសមុទ្រ និងការគំរាមកំហែងនៃការកើនឡើងនៃកម្ពស់ទឹកសមុទ្រ។ ព្រៃកោងកាងជារបៀងយុទ្ធសាស្រ្តតភ្ជាប់ប្រព័ន្ធអេកូឡូស៊ីពីតំបន់ដីគោក ឆ្នេរ និងសមុទ្រ ហើយក៏ជារនាំងប្រឆាំងនឹងគ្រោះធម្មជាតិ និងការប្រែប្រួលអាកាសធាតុដែលចូលរួមចំណែកកាត់បន្ថយការបំភាយឧស្ម័នផ្ទះកញ្ចក់ ជាដែនជម្រក និងប្រភពមេពូជនៃមច្ឆាធម្មជាតិដែលជាប្រភពធនធានសមុទ្រដ៏សម្បូរបែប ហើយចាំបាច់យើងត្រូវការពារ អភិរក្ស និងដាំស្តារព្រៃកោងកាងឡើងវិញ។
ក្របខណ្ឌការងារសង្គមផ្នែកបរិស្ថានរបស់ ប៉េង ហួត គ្រុប គឺបានចូលរួមចំណែកជាច្រើនដូចជាការអនុវត្តមេត្រីភាពបរិស្ថានតាមរយៈការដាំដើមឈើទាំងក្នុងនិងក្រៅគម្រោងរបស់ក្រុមហ៊ុន ការឧបត្ថម្ភរថយន្តសម្អាតផ្លូវដល់ខណ្ឌមួយចំនួនក្នុងរាជធានីភ្នំពេញដើម្បីលើកកម្ពស់ហេដ្ឋារចនាសម្ព័ន្ធទីក្រុងស្អាត ការផ្សព្វផ្សាយចំណេះដឹងលើការគ្រប់គ្រងសំណល់ប្លាស្ទិកជាសាធារណៈ ការចូលរួមសកម្មភាពរើសសំរាមក្នុងទិវាបរិស្ថានពិភពលោក រួមជាមួយការបង្កើតកម្មវិធីទិវាបរិស្ថាន PH Eco Day ប្រចាំឆ្នាំ៕
