(បរទេស)៖ សិង្ហបុរី ដែលជាប្រទេសមួយស្ថិតនៅតំបន់ខ្សែអេក្វាទ័រ និងទទួលរងឥទ្ធិពលភ្លៀងមូសុងជាញឹកញាប់ កំពុងតែត្រៀមខ្លួនបើកទំព័រថ្មីមួយក្នុងវិស័យថាមពលកកើតឡើងវិញ។ អ្នកវិទ្យាសាស្ត្រនៅសាកលវិទ្យាល័យជាតិសិង្ហបុរី (NUS) បានបង្កើតប្រព័ន្ធបដិវត្តន៍មួយដែលអាចបំប្លែងថាមពលពីទឹកភ្លៀងទៅជាអគ្គិសនីដោយមានប្រសិទ្ធភាពខ្ពស់ជាងវារីអគ្គិសនីបែបប្រពៃណីរហូតដល់ ១០ដង។
ខុសពីវារីអគ្គិសនីបែបប្រពៃណីដែលពឹងផ្អែកលើទំនប់ទន្លេ និងហេដ្ឋារចនាសម្ព័ន្ធធំៗ ការស្រាវជ្រាវថ្មីនេះប្រើប្រាស់បច្ចេកវិទ្យាបំពង់បញ្ឈរដែលមានចរន្តអគ្គិសនីដើម្បីចាប់យកថាមពលពីដំណក់ទឹកភ្លៀង។ នៅពេលដំណក់ទឹកធ្លាក់កាត់បំពង់ វាបង្កើតលំហូរទឹកមួយប្រភេទដែលហៅថា "plug flow" ដែលជួយបង្កើតបន្ទុកអគ្គិសនីតាមបណ្តោយផ្ទៃបំពង់។ អេឡិចត្រូតដែលដាក់នៅចុងបំពង់នឹងប្រមូលយកថាមពលដែលបានបង្កើតឡើងនេះ។
ការពិសោធន៍ក្នុងមន្ទីរពិសោធន៍បានបង្ហាញពីលទ្ធផលគួរឱ្យភ្ញាក់ផ្អើល។ ប្រព័ន្ធនេះអាចបំប្លែងថាមពលទឹកដែលធ្លាក់ជាង ១០% ទៅជាអគ្គិសនី ដែលមានប្រសិទ្ធភាពខ្ពស់ជាងវិធីសាស្ត្រប្រើប្រាស់ស្ទ្រីមទឹកធម្មតារហូតដល់ប្រាំដង។ ជាក់ស្តែង ក្រុមអ្នកស្រាវជ្រាវបានបង្ហាញថាថាមពលដែលបានបង្កើតអាចបំភ្លឺអំពូល LED ចំនួន ១២ ជាប់ៗគ្នាបាន ២០ វិនាទី។ កាន់តែសំខាន់នោះ ការបង្កើនចំនួនបំពង់អាចបង្កើនទិន្នផលថាមពលបានយ៉ាងងាយស្រួល ដែលធ្វើឱ្យបច្ចេកវិទ្យានេះមានសក្តានុពលខ្ពស់សម្រាប់ការអនុវត្តទ្រង់ទ្រាយធំ។
អត្ថប្រយោជន៍ដ៏ធំមួយនៃបច្ចេកវិទ្យានេះគឺលទ្ធភាពនៃការដំឡើងនៅតាមទីតាំងនានាដែលមានភ្លៀងធ្លាក់ច្រើនដូចជានៅលើដំបូលអាគារ ឬក្នុងតំបន់ដែលគ្មានបណ្តាញអគ្គិសនី។ នេះធ្វើឱ្យវាជាជម្រើសដ៏ល្អមួយសម្រាប់ទីក្រុងដែលមានប្រជាជនច្រើន និងសម្រាប់ការផ្គត់ផ្គង់ថាមពលដល់ឧបករណ៍នានានៅកន្លែងដាច់ស្រយាល។
ការរកឃើញនេះមិនត្រឹមតែបង្ហាញពីសមត្ថភាពក្នុងការបំប្លែងភ្លៀងមូសុងទៅជាធនធានថាមពលស្អាតប៉ុណ្ណោះទេ ប៉ុន្តែក៏បើកផ្លូវសម្រាប់ការច្នៃប្រឌិតថាមពលកកើតឡើងវិញថ្មីៗផងដែរ ដែលសូម្បីតែលក្ខខណ្ឌអាកាសធាតុក៏អាចក្លាយជាផ្នែកមួយនៃបណ្តាញថាមពលជាតិបានដែរ៕
