(បរទេស)៖ ក្រុមហ៊ុន Tesla បានចាប់ផ្តើមដំណើរការស្ថានីយ៍សាកថ្មជំនាន់ទី៤ (V4 Superchargers) ជាផ្លូវការជាលើកដំបូង​នៅក្នុងប្រទេសចិន នៅថ្ងៃទី៣០ មិថុនា ២០២៥។ ស្ថានីយ៍ទាំងនេះត្រូវបានដំឡើងនៅតាមតំបន់សំខាន់ៗដូចជា ទីក្រុង សាងហៃ, ទីក្រុង ឆុងឈីង, ខេត្ត កាន់សូ និងខេត្ត ចេជាំង។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី៣០ ខែមិថុនា ឆ្នាំ២០២៥។

ស្ថានីយ៍សាកថ្ម V4 នេះអាចបញ្ជូនថាមពលបានដល់ទៅ ៥០០គីឡូវ៉ាត់ ដែលលឿនជាងម៉ូឌែល V3 ជំនាន់មុន ហើយអាចប្រើសម្រាប់រថយន្តអគ្គិសនីគ្រប់ម៉ាកមិនត្រឹមតែរថយន្ត Tesla ទេ ឬរថយន្តម៉ាក់ផ្សេងនោះទេ។ វាគឺជាលើកដំបូងនៅប្រទេសចិនដែលស្ថានីយ៍សាក Tesla បើកដំណើរការជាសាធារណៈបែបនេះ។ Tesla បានបង្ហាញផែនការពង្រីកបន្តនូវស្ថានីយ៍ V4 ទៅទីក្រុង ប៉េកាំង, ខេត្ត ក្វាងទុង និងតំបន់សេដ្ឋកិច្ចសំខាន់ៗផ្សេងទៀតនៅក្នុងប្រទេស។ លក្ខណៈពិសេសនៃស្ថានីយ៍ V4 Superchargers គឺសាកថ្មលឿនជាងមុន ពោលវាមានសមត្ថភាពផ្គត់ផ្គង់ថាមពលដល់ទៅ ៥០០គីឡូវ៉ាត់ និងគាំទ្របានគ្រប់ម៉ាករថយន្ត ដោយប្រើខ្សែសាកប្រភេទ GB/T ដែលសមរម្យសម្រាប់រថយន្តអគ្គិសនីនៅក្នុងចិន។ ក្រៅពីនេះវាមានបច្ចេកវិទ្យាទំនើប ដោយមានប្រព័ន្ធបញ្ជាសាកដោយ (RFID) ហើយអត់ចាំបាច់ប្រើ App របស់ Tesla ហើយវាជាការផលិតក្នុងស្រុក ពោលត្រូវបានផលិតនៅរោងចក្រ Tesla សាខាសាងហៃ។

គួរជម្រាបថា ប្រទេសចិនកំពុងស្ថិតនៅចំណុចកើនឡើងខ្លាំងនៃការអភិវឌ្ឍបណ្តាញសាកថ្មល្បឿនលឿនសម្រាប់រថយន្តអគ្គិសនី។ ក្រុមហ៊ុន BYD និងក្រុមហ៊ុនជាតិដទៃក៏កំពុងសាកល្បងបច្ចេកវិទ្យាសាកថ្មដែលអាចផ្គត់ផ្គង់ថាមពលដល់ទៅ ១,០០០គីឡូវ៉ាត់ ផងដែរ។ Tesla សព្វថ្ងៃមានស្ថានីយ៍សាកជាង ២,១០០ កន្លែង និង ចំណតសាកជាង ១១,៦០០ គ្រឿង នៅទូទាំងប្រទេសចិន៕