(ភ្នំពេញ)៖ អ្នកឧកញ៉ា គឹម សុខអេង  ប្រធានសភាយុវពាណិជ្ជករកម្ពុជា សាខាងមេគង្គ JCI Mekong និងជាម្ចាស់គម្រោង ម្ចាស់គម្រោងបុរី KK The Residence 598 ត្រូវបានស្ថានប័នអន្តរជាតិល្បីឈ្មោះមួយ ​ប្រគល់ពានរង្វាន់«ជើងឯកអាជីវកម្ម CSR អាស៊ានឆ្នាំ 2025(GREAT ASEAN CSR BUSINESS AWARD 2025​)»​ដែលបង្ហាញ​​​ពីចូលរួមចំណែកជួយដល់សង្គម និងទំនួលខុសត្រូវចំពោះសង្គម​។​

ការផ្តល់ពានរង្វាន់ ​ពីស្ថាប័ន Asia Prestige CEO Excellence Award បានឆ្លុះបញ្ចាំងពីភាពជាអ្នកដឹកនាំអាជីវកម្ម​ ​ការរួមចំណែកជួយសង្គម និងបន្តជំរុញឱ្យមានការផ្លាស់ប្តូរជាវិជ្ជមាននៅទូទាំងតំបន់អាស៊ាន។

សកម្មភាពជួយសង្គម ដែលអ្នកឧកញ៉ាបានធ្វើ​កន្លងមក មានដូចជា ជួយមន្ទីរពេទ្យគន្ធបុប្ផា សង់សាលារៀន​នៅតាមតំបន់ជនបទ ដើម្បីលើកកម្ពស់ការសិក្សារបស់កុមារនៅតាមតំបន់ជនបទ។ នា​ពេលអនាគត ​អ្នកឧកញ៉ា ក៏មានគម្រោងច្នៃផ្ទះចាស់ៗ ជាផ្ទះថ្មី ជូនទៅដល់បងប្អូនដែលគ្មានផ្ទះសម្បែង បានរស់នៅជាសហគមន៍ផងដែរ។

ក្នុងនាមជាម្ចាស់ពានរង្វាន់«ជើងឯកអាជីវកម្ម CSR អាស៊ានឆ្នាំ 2025» ​អ្នកឧកញ៉ា គឹម សុខ អេង បានទឹកចិត្តដល់​ម្ចាស់អាជីវកម្មផ្សេងៗទៀត ចូលរួមជួយដល់សង្គមឱ្យបានច្រើនតាមដែលអាចធ្វើទៅបាន មិនថាជាទឹកប្រាក់ ឬ កម្លាំងកាយ ឬ កម្លាំងចិត្ត ឬគំនិតច្នៃប្រឌិត ឬផែនការផ្សេងៗ សុទ្ធតែជាគុណតម្លៃដែលសង្គមត្រូវការទាំងអស់​ ដែលជាផ្នែកមួយជួយឱ្យសង្គមជាតិកាន់តែរីកចម្រើន។

​ជាមួយគ្នានេះ ​អ្នកឧកញ៉ា គឹម សុខ អេង បានថ្លែងអំណរគុណដល់ ស្ថាប័ន Asia Prestige CEO Excellence Award ដែលបានផ្តល់ពានរង្វាន់ ASEAN CSR BUSINESS AWARD 2025 ជូនអ្នកឧកញ៉ា ដែលជាកម្លាំងចិត្តក្នុងការចូលរួមជួយសង្គមបន្តទៀត។

​សូមជម្រាបថា អ្នកឧកញ៉ា គឹម សុខអេង ​​គឺ​ជា​ម្ចាស់បុរី ខេស៊ី (Borey KC) ​ដែលមានទីតាំងស្ថិតនៅជិត​ផ្សារ​ព្រែកព្នៅ ខណ្ឌ​ព្រែកព្នៅ និងបុរី KK The Residence 598 ផ្លូវជាសុផារ៉ា​ ដែលជាគម្រោងអភិវឌ្ឍន៍លំនៅឋានបែបទំនើបស៊ីវិល័យ។
អ្នកឧកញ៉ាក៏ជា​ស្ថាបនិក​ក្លិប​ហាត់ប្រាណ​ បឹងកេងកង ​,ជាស​មាជិកសមាគមឧកញ៉ាកម្ពុជា,សមាជិកសមាគមសហគ្រិនវ័យក្មេងកម្ពុជា និងសមាជិកសមាគមអភិវឌ្ឍន៍លំនៅដ្ឋានកម្ពុជាផងដែរ៕