(បរទេស)៖ ក្រុមហ៊ុន Microsoft បានចេញការព្រមានបន្ទាន់មួយអំពី «ការវាយប្រហារសកម្ម» លើកម្មវិធីម៉ាស៊ីនមេ SharePoint ដែលត្រូវបានប្រើប្រាស់យ៉ាងទូលំទូលាយដោយរដ្ឋាភិបាល និងអាជីវកម្មនានា ដើម្បីចែករំលែកឯកសារ។ ក្រុមហ៊ុនបានណែនាំឱ្យអ្នកប្រើប្រាស់ធ្វើបច្ចុប្បន្នភាពសុវត្ថិភាពជាបន្ទាន់។ នេះបើយោងតាមការរាយការណ៍របស់ CNA នៅថ្ងៃទី២១ ខែកក្កដា ឆ្នាំ២០២៥។

ការិយាល័យស៊ើបអង្កេតសហព័ន្ធ (FBI) បានបញ្ជាក់ថា ខ្លួនបានដឹងពីការវាយប្រហារនេះ ហើយកំពុងសហការជាមួយដៃគូពាក់ព័ន្ធ។

Microsoft បានបញ្ជាក់ថា ភាពងាយរងគ្រោះនេះប៉ះពាល់តែ ម៉ាស៊ីនមេ SharePoint ដែលប្រើប្រាស់ក្នុងស្ថាប័នប៉ុណ្ណោះ ខណៈដែល SharePoint Online ក្នុង Microsoft 365 មិនត្រូវបានប៉ះពាល់ឡើយ។ កាសែត The Washington Post បានរាយការណ៍ថា ការវាយប្រហារនេះគឺជាការវាយប្រហារ "zero-day" ដែលកំណត់គោលដៅលើភាពចន្លោះប្រហោងដែលមិនទាន់ត្រូវបានគេស្គាល់ពីមុន។ អ្នកជំនាញបាននិយាយថា ម៉ាស៊ីនមេរាប់ម៉ឺនគ្រឿងបានប្រឈមនឹងហានិភ័យ។

ក្រុមហ៊ុនបានបន្ថែមថា ភាពងាយរងគ្រោះនេះអាចអនុញ្ញាតឱ្យអ្នកវាយប្រហារក្លែងបន្លំអត្តសញ្ញាណនៅលើបណ្ដាញ។ ជាមួយគ្នានេះ Microsoft បានចេញផ្សាយការធ្វើបច្ចុប្បន្នភាពសុវត្ថិភាពសម្រាប់ SharePoint Subscription Edition ហើយកំពុងដំណើរការការធ្វើបច្ចុប្បន្នភាពសម្រាប់កំណែឆ្នាំ ២០១៦ និង ២០១៩ ផងដែរ។ ក្នុងករណីដែលអតិថិជនទាំងអស់មិនអាចបើកការការពារមេរោគបាន ក្រុមហ៊ុនណែនាំឱ្យផ្តាច់ម៉ាស៊ីនមេពីអ៊ីនធឺណិតជាបណ្តោះអាសន្ន រហូតទាល់តែមានជូនដំណឹងជាថ្មី៕