(បរទេស)៖ កំពូលមហាសេដ្ឋីបច្ចេកវិទ្យាលោក Elon Musk បានប្រកាសថា នឹងត្រឡប់មករកកាលវិភាគការងារដ៏មមាញឹកវិញម្តងទៀត ដោយបង្ហាញថា កំពុងតែវិលត្រឡប់ទៅជា CEO ធ្វើការដូចព្យុះ (wartime CEO)។

លោក Elon Musk បានបង្ហោះក្នុងបណ្តាញសង្គម X ថា ខ្លួនមានបំណងធ្វើការពេញ៧ថ្ងៃក្នុងមួយសប្តាហ៍ និងដេកនៅការិយាល័យ ពេលកូនៗរបស់លោកមិននៅជាមួយ។ ការបង្ហាញព័ត៌មាននេះកើតឡើងជាចម្លើយចំពោះការបង្ហោះឡើងវិញ (quote tweet) ពីអ្នកប្រើប្រាស់ឈ្មោះ SMX ដែលបានយោងទៅការនិយាយមុនៗរបស់ Musk អំពីវិន័យការងាររបស់លោក។ ការបង្ហោះនេះទទួលបានការចាប់អារម្មណ៍យ៉ាងខ្លាំង មានការទស្សនាច្រើនជាង ៨.៦ លានដង។ វាស្ទើរតែបង្ហាញសារជាថ្មីនូវទំរង់ការងាររបស់ Musk នៅអតីតកាល ដែលលោកធ្លាប់ធ្វើការពេញម៉ោងនិងបាត់បង់ជីវិតផ្ទាល់ខ្លួនក្នុងអំឡុងពេលខិតខំធ្វើការ។

ការត្រឡប់ទៅជាទំរង់ CEO ពេញម៉ោងនេះអាចជាសញ្ញាបង្ហាញថា Tesla នឹងជួបប្រទះដំណាក់កាលនៃការផ្លាស់ប្តូរធំៗ និងការរីកចម្រើនយ៉ាងខ្លាំង។ នៅអតីតកាល ក្រុមហ៊ុននេះ ត្រូវបានគេដឹងថាមានការច្នៃប្រឌិតថ្មីៗ និងការអភិវឌ្ឍដ៏ខ្លាំងនៅក្នុងក្រុមហ៊ុន។

ទោះបីជាមិនមានការរៀបរាប់ច្បាស់លាស់នៅជុំវិញការបង្ហោះនោះក៏ដោយ ក៏វាបង្ហាញថា ការតាំងចិត្តរបស់ Elon Musk ចំពោះការងាររបស់លោកនៅតែរឹងមាំជាធម្មតា។ ក្នុងនាមជាម្ចាស់ដឹកនាំក្រុមហ៊ុនឆ្នើមនៃវិស័យបច្ចេកវិទ្យា លោក Elon Musk បន្តទាក់ទាញទាំងការចាប់អារម្មណ៍ និងការព្រួយបារម្ភពីសាធារណជនចំពោះទម្លាប់ការងាររបស់លោក៕