(ភ្នំពេញ)៖ ក្នុងឆ្នាំ២០២៤កន្លងទៅនេះ កម្ពុជាផលិតអំបិលបានប្រមាណជាង ១៦ម៉ឺនតោន ដែលលើសតម្រូវការចាំបាច់ប្រើប្រាស់ប្រចាំថ្ងៃ របស់ប្រជាពលរដ្ឋក្នុងប្រទេសជិតពាក់កណ្តាល ដោយក្នុងមួយឆ្នាំៗ កម្ពុជាមានតម្រូវការអំបិលចន្លោះពី ៨ម៉ឺនតោនទៅ ១០ម៉ឺនតោនប៉ុណ្ណោះ។
យោងតាមរបាយការណ៍របស់ក្រសួងឧស្សាហកម្ម វិទ្យាសាស្រ្តបច្ចេកវិទ្យា និងនវានុវត្តន៍ បានឱ្យដឹងថា ក្នុងឆ្នាំ២០២៤ ទិន្នផលអំបិលនៅកម្ពុជាសរុបមានចំនួន ១៦៨ ៨៨២ តោន ដែលបានផលិតលើផ្ទៃដីស្រែអំបិលចំនួន ៣ ៩៨៧.៣៥ហិកតា ក្នុងខេត្តកំពត និងខេត្តកែប។
លោក ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានប្រាប់បណ្តាព័ត៌មាន Fresh News ថា ការផលិតអំបិលលើសពីតម្រូវនេះ ដោយសារកាលពីឆ្នាំមុន អាកាសធាតុក្តៅអំណោយផលល្អ និងការអូសបន្លាយនៃរដូវប្រាំង ដែលបានធ្វើឱ្យកសិករផលិតអំបិលបានច្រើន ដោយសង្កេតឃើញថា គ្រាន់តែក្នុងខែមិថុនា និងខែកក្កដា កសិករអាចផលិតបានរហូតដល់ ៤៤ ២៨៣តោន ខណៈជាធម្មតាការផលិតអំបិល គឺស្ថិតនៅចន្លោះខែមករា និងខែកុម្ភៈ។
បើតាមមន្រ្តីជាន់ខ្ពស់នៃក្រសួងឧស្សាហកម្មរូបនេះ ក្នុងមួយឆ្នាំៗកម្ពុជា មានតម្រូវការអំបិលចន្លោះពី ៨ម៉ឺនតោនទៅ ១០ម៉ឺនតោនប៉ុណ្ណោះ ទាំងអំបិលសម្រាប់បរិភោគ អំបិលកសិកម្ម និងសម្រាប់ឧស្សាហកម្ម ដូច្នេះហើយកាលពីឆ្នាំ២០២៤ ពុំមានការនាំចូលអំបិលពីបរទេសទេ។ តែយ៉ាងនេះ គេសង្កេតអាចនឹងសង្កេតឃើញវត្តមានអំបិលរបស់ប្រទេសជិតខាង នៅក្នុងទីផ្សារកម្ពុជា ដោយសារមានការនាំចូលខ្លះៗ។
លោកបានឱ្យដឹងយ៉ាងដូច្នេះថា «ការផលិតអំបិលនេះ គឺកសិកររបស់យើងអាស្រ័យទាំងស្រុង ទៅលើអាកាសធាតុផ្ទាល់តែម្តង យើងឃើញថា នៅតាមបណ្តាឆ្នាំនីមួយៗ កាលផលិតមានការឡើងចុះ ហើយនៅក្នុងឆ្នាំខ្លះក៏យើងមានការខ្វះខាតអំបិល ត្រូវធ្វើការនាំចូលពីក្រៅប្រទេសផងដែរ តែយ៉ាងណាក្នុងឆ្នាំ២០២៤ គឺយើងផលិតបានលើសតម្រូវការហើយ ពុំមានតម្រូវការនៃការនាំចូលនោះទេ។ ប៉ុន្តែជាក់ស្តែងនៅក្នុងទីផ្សារ ដោយសារកម្ពុជារបស់យើងជាមួយនឹងបណ្តាប្រទេសអាស៊ាន ដែលយើងដឹងថាជាសមាហរណកម្មសេដ្ឋកិច្ច ដែលនៅក្នុងនោះបណ្តាប្រទេសទាំងអស់ មានលទ្ធភាពក្នុងការនាំចេញនាំចូលដោយសេរី អ៊ឺចឹងហើយទើបយើងឃើញមានការនាំចូល នូវអំបិលពីបណ្តាប្រទេសអាស៊ានយើងមួយចំនួនមកកម្ពុជាផងដែរ»។
លោក ហេង សុខគង់ បានឱ្យដឹងផងដែរថា ខណៈអំបិលកម្ពុជាក្លាយជាទំនិញម៉ាកសម្គាល់ភូមិសាស្រ្តទំនិញ (GI) កាលពីឆ្នាំ២០២៣ និងទទួលបានការវាយតម្លៃខ្ពស់ពីសំណាក់ បណ្តាប្រទេសពីសហគមន៍អឺរ៉ុប ថាជាអំបិលមួយដែលមានគុណភាពល្អ និងសំបូរទៅដោយសារធាតុរ៉ែ ជំនួយទៅដល់សុខភាពអ្នកប្រើប្រាស់ ក៏កំពុងទទួលបានការចាប់អារម្មណ៍ទីផ្សារប្រទេសមួយចំនួន ក្នុងការនាំចូលទៅប្រទេសគេផងដែរ។
លោកបានពន្យល់បន្ថែមថា «តាមការពិនិត្យនិងវាយតម្លៃរបស់អ្នកជំនាញនៅសហគមន៍អឺរ៉ុប គឺអំបិលយើងមានសារធាតុរ៉ែ ដែលមាននៅក្នុងនៅក្នុងអំបិលរហូតជាង ៨០ប្រភេទ ដែលជំនួយទៅដល់សុខភាពអ្នកប្រើប្រាស់ ហើយអំបិលនោះមានលក្ខណៈផ្អែម មិនប្រៃពេកហើយក៏មិនរឹងពេកដែរ នេះជាលក្ខណៈពិសេសរបស់អំបិលកម្ពុជាយើង។ បច្ចុប្បន្នអំបិល GI របស់យើងមានទីផ្សារធំនៅសហគមន៍អឺរ៉ុប ហើយជប៉ុន សហរដ្ឋអាមេរិក អូស្រ្តាលី និងកូរ៉េខាងត្បូង ក៏កំពុងចាប់អារម្មណ៍លើអំបិលរបស់កម្ពុជាដែរ»។
សូមជម្រាបផងដែរថា បច្ចុប្បន្ននេះ ក្រុមផលិតអំបិលមានចំនួន១៩១ក្រុម និងមានសិប្បកម្មចំនួន ៥៤មូលដ្ឋាន ក្នុងនោះ៣២មូលដ្ឋាន ទទួលបានអាជ្ញាបណ្ណ ប្រើប្រាស់ស្លាកសញ្ញាជាតិសម្គាល់អំបិលដែលបានបញ្ចូលអ៊ីយ៉ូដ៕
