(ភ្នំពេញ)៖ លោក ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បាន​​​លើកទឹកចិត្តដល់ម្ចាស់អាជីវកម្មនៅកម្ពុជា ប្រើប្រាស់បណ្តាញទំនាក់ទំនង CoolApp សម្រាប់ដែនសុវត្ថិភាពក្នុងស្រុក ដើម្បីជៀសវាងការលួចយកទិន្នន័យផ្សេងៗ។

លើកឡើងក្នុងកម្មវិធី ​​FRESH BUSINESS ជជែកពីសន្តិសុខសាយប័រ លើប្រធានបទ៖ «ផលប៉ះពាល់នៃសុវត្ថិភាពតាមអ៉ិនធើណិត លើអាជីវកម្មខ្នាតតូច»​​ លោកបានសម្គាល់ឃើញថា ក្នុងការធ្វើអាជីវកម្មមួយចំនួន​នឹងមានការផ្ញើទិន្នន័យផ្សេងៗទៅវិញទៅមក តាមបណ្តាញទំនាក់ទំនងសង្គមផ្សេងៗ ដែលអាចនឹងប្រឈមមុខការលួចយកទិន្នន័យផ្សេងៗ ព្រោះរាល់ការផ្ញើសារភាគច្រើននឹងផ្ញើទៅ Data center ដែលបច្ចុប្បន្ន មាននៅសហរដ្ឋអាមេរិក សិង្ហបុរីជាដើម។

លោកបន្ថែមថា កន្លងមកក៏មានម្ចាស់អាជីវកម្មតែងតែរងនូវការលួចយកទិន្នន័យពីជនអនាមិក ហេតុដូច្នេះហើយ​ម្ចាស់អាជីវកម្មនានា គួរតែជ្រើសរើសប្រព័ន្ធទំនាក់ទំនងណាមួយដែលផ្តល់នូវទំនុកចិត្តខ្ពស់។ ​លោកលើកទឹកចិត្តដល់ម្ចាស់អាជីវកម្ម ប្រើប្រាស់ បណ្តាញទំនាក់ទំនងសង្គម CoolApp ដែលជាបណ្តាញសង្គមបង្កើតឡើងដោយកូនខ្មែរ ដែលអាចផ្តល់នូវសុវត្ថិភាពខ្ពស់ ក្នុងការទំនាក់ទំនង ឬការផ្ញើទិន្នន័យផ្សេងៗ។ ​ជាមួយគ្នានេះ CoolApp មានមុខងារច្រើន និងអាចផ្ញើរូបភាពបានច្បាស់ល្អ ដែលផ្តល់ភាពងាយស្រួលដល់ការទំនាក់ទំនងផងដែរ។

​លោកបន្ថែមថា «ដូចដែលយើងបានឃើញហើយថា​ កន្លងមកនេះសម្តេចតេជោ ហ៊ុន សែន ក៏លោកប្រកាសដែរថា យើង​នៅកម្ពុជា ​គួរនាំគ្នាប្រើ CoolApp ទៅ ព្រោះវាជា Platform របស់ជាតិយើង»​។

សូមជម្រាបថា CoolApp គឺជាបណ្តាញទំនាក់ទំនងលើកដំបូងរបស់កម្ពុជា ប្រើប្រាស់ក្នុងដែនសុវត្ថិភាពប្រទេសខ្មែរ និងកំពុងទទួលបានការគាំទ្រពីប្រជាពលរដ្ឋខ្មែរ ដែលមកទល់ពេលបច្ចុប្បន្ននេះ មានអ្នកប្រើប្រាស់ប្រមាណជាងកន្លះលាននាក់។

តាមរយៈ CoolApp លោកអ្នកអាចខលរកគ្នាច្បាស់ទាំងរូបភាព និងសំឡេងងាយស្រួលដល់ការទំនាក់ទំនង។ ជាមួយគ្នា លោកអ្នកក៏អាចផ្ញើរូបភាព ជា Original File (រូបភាពទំហំធំ) បាន​ ជាមួយគុណភាពច្បាស់ ផ្ញើសារជា File ទំហំប៉ុន្មាន គឺផ្ញើចេញទៅទំហំដូចគ្នា ទាំងរូបភាព និងវិដេអូ​៕