(ភ្នំពេញ)៖ លោក ឡុង ឌីម៉ង់ អភិបាលរង និងជាអ្នកនាំពាក្យរដ្ឋបាលខេត្ដព្រះសីហនុ បានថ្លែងអំពាវនាវដល់សាធារណជន ប្រជាពលរដ្ឋទាំងអស់រួមគ្នាលុបបំបាត់បញ្ហាអសន្ដិសុខ ដើម្បទាក់ទាញអ្នកវិនិយោគ និងភ្ញៀវទេសច។

ការលើកឡើងរបស់ លោក ឡុង ឌីម៉ង់ ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «ផែនការអភិវឌ្ឍន៍ខេត្តព្រះសីហនុ ទៅជាតំបន់សេដ្ឋកិច្ចពហុបំណង»។

លោក ឡុង ឌីម៉ង់ បានថ្លែងឲ្យដឹងថា សន្ដិសុខសណ្ដាប់ធ្នាប់របៀបរាបរយសង្គមនេះ ជាចំណុចស្នូល និងដ៏មានអទិភាពបំផុត ដើម្បទាក់ទាញអ្នកវិនិយោគ និងទេសចរណ៍។ ទាល់តែ ប្រទេសមានសុខសន្ដិភាព ស្ថេរភាពនយោបាយ ស្ថេរភាពសេដ្ឋកិច្ចសង្គម ទើបបរទេសហ៊ានមកវិនិយោគ និងមកលេងនៅកម្ពុជា ដូច្នេះបញ្ហាសន្ដិសុខនេះជាចំណុចសំខាន់ខ្លាំងណាស់។

លោកបានបន្ថែមថា ប្រសិនបើយើងមិនបានគិតគូរ ឬមើលឃើញធូររលុងនៃបញ្ហាសន្ដិសុខនេះ នោះគម្រោងផែនការមេអភិវឌ្ឍន៍ខេត្តតំបន់សេដ្ឋកិច្ចពិសេសគំរូពហុបំណង នាពេលឆាប់ៗខាងមុខនេះក៏មិនអាចអនុវត្តន៍ និងធ្វើបានជោគជ័យបាននោះទេ។ ដូច្នេះហើយបានជារាជរដ្ឋាភិបាល បានកំណត់ជាអទិភាពស្នូលមួយ ហើយការប្ដេជ្ញាចិត្តរបស់រាជរដ្ឋាភិបាល រួមទាំងកងកម្លាំងសមត្ថកិច្ច ទាំងថ្នាក់ជាតិ ទាំងថ្នាក់ខេត្ត បានពង្រឹង រៀបចំផែនការប្រតិបត្តិការបោសសំអាតនូវរាល់សកម្មភាពមួយចំនួន ដែលបានប្រព្រឹត្តិទៅក្នុងមូលដ្ឋាន៕

សូមស្តាប់ការលើកឡើងរបស់លោក ឡុង ឌីម៉ង់៖