(ភ្នំពេញ)៖ លោក អ៊ីណាម៉ូរី កាហ៊្សូអូ ជាអ្នកជំនួញ និងទស្សនវិទូជនជាតិជប៉ុនដ៏ល្បីល្បាញ ដែលត្រូវបានគេទទួលស្គាល់យ៉ាងទូលំទូលាយ នៅជប៉ុន និងក្នុងពិភពលោក។

លោក គឺជាស្ថាបនិកក្រុមហ៊ុនផលិតសេរ៉ាមិចប្រណិត និងគ្រឿងអេឡិចត្រូនិកនៅជប៉ុន ដែលបានខិតខំបង្កើតក្រុមហ៊ុននេះ តាំងពីដៃទទេ រហូតដល់ក្លាយជាក្រុមហ៊ុនធំ ដែលមានចំណូលរាប់ពាន់លានដុល្លារ។ បន្ថែមពីនេះ លោកក៏ជាអ្នកជំនួញរកស៊ីក្នុងវិស័យផ្សេងទៀតផងដែរ ដូចជាវិស័យទូរគមនាគមន៍ជាដើម។ ហើយលោក​ក៏ជាបុគ្គលម្នាក់ដែលបានជួយស្តារ និងសង្រ្គោះ​ ក្រុមហ៊ុនអាកាសចរណ៍ជប៉ុន ដែលជិតក្ស័យធនឱ្យរស់ឡើងវិញផងដែរ។ ហេតុដូច្នេះហើយ ទើបធ្វើឱ្យលោកមានកេរ្តិ៍ឈ្មោះល្បីល្បាញ​ ​ ​ហើយទស្សនវិជ្ជានៃការធ្វើអាជីវកម្មរបស់លោក ក៏ត្រូវបណ្តាប្រទេសមួយចំនួនយកទៅអនុវត្ត។

លោក យស សិលារ័ត្ន ទីប្រឹក្សាជាន់ខ្ពស់នៃក្រុមហ៊ុន Meiho Engineering និងជាអគ្គនាយកក្រុមហ៊ុន Meiho អភិវឌ្ឍន៍ បានឱ្យដឹងថា ក្នុងការធ្វើអាជីវកម្មឱ្យជោគជ័យ និងរឹងមាំមាននិរន្តភាព លោក អ៊ីណាម៉ូរី កាហ៊្សូអូ ប្រកាន់ភ្ជាប់នូវគោលការណ៍ធ្វើអាជីវកម្ម ១២ចំណុច។ ក្នុងនោះ លោក អ៊ីណាម៉ូរី កាហ៊្សូអូ ជឿជាក់ថា ក្នុងការធ្វើអាជីវកម្មឱ្យមានភាពយូរអង្វែង គឺត្រូវការគោលការណ៍ច្បាស់លាស់ ដែលជាធាតុស្នូលជំរុញឱ្យការធ្វើអាជីវកម្មមានភាពរឹងមាំ។

គោលការណ៍ទាំង ១២ចំណុចនោះរួមមាន៖
១.កំណត់គោលបំណង និងអត្ថន័យនៃអាជីវកម្មឱ្យបានច្បាស់លាស់
២.ដាក់គោលដៅច្បាស់លាស់
៣. ប្រកាន់ខ្ជាប់នូវបំណងប្រាថ្នា ក៏ខ្លាំងក្លានៅក្នុងចិត្ត
៤. ខិតខំប្រឹងប្រែងមិនឱ្យចាញ់គេ
៥. បង្កើនចំណូលឱ្យបានច្រើនបំផុត បន្តឹងចំណាយឱ្យតិចបំផុត
៦.អាជីវកម្មអាស្រ័យលើការកំណត់តម្លៃ
៧. អាជីវកម្មកំណត់ដោយការមានឆន្ទៈមោះមុត
៨. ចិត្តប្រយុទ្ធដ៏ពុះកញ្រ្ជោល
៩. ប្រឈមមុខនឹងកិច្ចការគ្រប់យ៉ាងដោយភាពក្លាហាន
១០. ធ្វើការងារបែបច្នៃប្រឌិតជាប់ជានិច្ច
១១. ធ្វើការងារស្មោះត្រង់ ជាមួយនឹងសណ្ដានចិត្តគិតគូរដល់អ្នកដទៃ
១២. មានភាពស្រស់ថ្លា និងគំនិតវិជ្ជមានជាប់ជានិច្ច មានក្តីសុបិន និងក្តីសង្ឃឹមជាប់ក្នុងចិត្ត ដែលពោពេញដោយភាពស្មោះត្រង់

តាមរយៈភាពជោគជ័យនៃការធ្វើអាជីវកម្មរបស់ លោក អ៊ីណាម៉ូរី កាហ៊្សូអូ ​មជ្ឈមណ្ឌល​សហប្រតិបត្តិការកម្ពុជា-ជប៉ុន (CJCC) បើកវគ្គបណ្តុះបណ្តាល ដើម្បីផ្សព្វផ្សាយពីការធ្វើជំនួញរបស់អ្នកជំនួញល្បីឈ្មោះរូបនេះ។ វគ្គសិក្សានេះ នឹងផ្តោតជាសំខាន់ ​ទៅលើ គោលការណ៍គ្រប់គ្រងអាជីវកម្មទាំង ១២របស់លោកអ៊ីណាម៉ូរី។ វគ្គសិក្សានេះ នឹងរៀបចំឡើង នៅថ្ងៃទី២៦ ខែមេសា ឆ្នាំ២០២៥។

លោក យស សិលារ័ត្ន បានលើកទឹកចិត្តដល់អាជីវករ អ្នកគ្រប់គ្រង ឬថ្នាក់ដឹកនាំរបស់ក្រុមហ៊ុននានា គួរតែចូលរួមក្នុងវគ្គសិក្សានេះ ដើម្បីសិក្សាពីគន្លឹះធ្វើឱ្យអាជីវកម្មរបស់ខ្លួនឈរ​ជើងបានរឹងមាំ និងមាននិរន្តភាព​ តាមរយៈគោលការណ៍ធ្វើអាជីវកម្មទាំង ១២ចំណុចនេះ៕

សូមស្តាប់ការលើកឡើងបន្ថែមរបស់ លោក យស សិលារ័ត្ន ៖