(ភ្នំពេញ)៖ ឧកញ៉ាបណ្ឌិត គឹម ហ៊ាង អ្នកជំនាញអចលនទ្រព្យបានថ្លែងឲ្យដឹងថា ជាការពិតណាស់ក្នុងនាមជាអ្នកលក់អចលនទ្រព្យ ដែលមានបទពិសោធន៍យូរឆ្នាំ ច្បាស់ជាដឹងពីបញ្ហា និងឱកាស ចំពោះការវិនិយោគលើអចលនទ្រព្យ ជាក់ស្ដែងក្នុងអំឡុងពេលមានគម្រោងព្រលានយន្តហោះថ្មី និងព្រែកជីកហ្វូណនតេជោ ជនឆក់ឱកាសនឹងលេចរូបរាងមក ដូច្នេះចូរប្រុងប្រយ័ត្ន ចំពោះជនឆ្លៀតឱកាសទាំងនោះ បោកប្រាស់ពីគម្រោងនានា។

ក្នុងកម្មវីធី FRESH BUSINESS: កិច្ចពិភាក្សាលើប្រធានបទ៖ «ឥទ្ធិពលព្រលានយន្តហោះអន្តរជាតិតេជោ និងគម្រោងព្រែកជីកហ្វូណនតេជោ ចំពោះតម្លៃដីធ្លី» លោកឧកញ៉ាបណ្ឌិត គឹម ហ៊ាង បានថ្លែងថា ជាការពិតណាស់ការបោកប្រាស់ជាជំនាញមួយ ដែលមិនទាមទារការរៀនពីសាលានោះទេ ហើយអ្នកដែលបោកប្រាស់គេ ក៏មិនមែនជាអ្នកដែលមិនចេះដឹងនោះដែរ ដើម្បីបញ្ចៀសពីការបោកប្រាស់ យើងត្រូវមានវិធីការពារ។

លោកឧកញ៉ាបណ្ឌិត គឹម ហ៊ាង បានថ្លែងឲ្យដឹងថា «ក្នុងពេលដែលយើងមានគម្រោងធំៗ ដូចព្រលានយន្ដហោះ និងព្រែកជីកហ្វូណននេះ ច្បាស់ណាស់គម្រោងបោកប្រាស់នឹងលេចរូបរាងមកដូចគ្នា ហើយដើម្បីកុំឲ្យចាញ់បោកគម្រោងបោក គឺសូមបុគ្គលទាំងអស់កុំលោភលន់ពេក, កុំគិតថាងាយស្រួលពេក។ កត្តាសំខាន់មួយទៀតមុននឹងយកលុយទៅវិនិយោគអ្វីមួយ សូមគិតហើយគិតទៀត គិតឲ្យច្បាស់លាស់ ត្រូវគិតថា រកលុយពិបាក ប៉ុន​្ដែ ពេលចាយលុយសូមគិតថា វាលំបាកជាងពេលរកលុយទៅទៀត»។

លោកឧកញ៉ាបណ្ឌិត គឹម ហ៊ាង បានបញ្ជាក់ថា មុននឹងវិនិយោគត្រូវដឹងនូវចំណុចខ្លះដូចជា ម្ចាស់គម្រោងជាអ្នកណា, ប្លង់ដីនៅទីណា, សើបឲ្យបានច្បាស់លាស់ ទៅមើលឲ្យដល់ទីកន្លែង មើលដីឲ្យផ្ទាល់ភ្នែក ដូច្នេះកុំលោភលន់ពេក កុំរំពឹងការចំណេញខ្ពស់ហួសហេតុពេក។

លោកឧកញ៉ាបណ្ឌិត គឹម ហ៊ាង បានបន្ថែមថា កត្តាសំខាន់ទៀតនោះ ប្រសិនបើមិនស្គាល់ម្ចាស់គម្រោងនោះទេ មិនមានឯកសារនានា ឬប្លង់ដីច្បាស់លាស់នោះទេ ដាច់ខាតកុំលូកដៃចូលវិនិយោគឲ្យសោះ៕

សូមស្តាប់ការលើកឡើងរបស់បណ្ឌិត គឹម ហ៊ាង៖