(ភ្នំពេញ)៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា បច្ចុប្បន្ននេះ កម្ពុជាមិនទាន់មានឯករាជ្យភាពក្នុងការផលិតជីកសិកម្មសម្រាប់ផ្គត់ផ្គង់ដល់កសិករនៅឡើយទេ ដែលទាមទារត្រូវតែមានរោងចក្រផលិតជីនៅកម្ពុជាដ៏ធំមួយ ដើម្បីជួយដល់កសិករ ឱ្យទទួលបាននូវជីដែលមានគុ​ណភាព និងតម្លៃសមរម្យ។

លោកបន្ថែមថា ដោយមើលឃើញពីបញ្ហានេះ បានជាកន្លងមក ​សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា​ បានជួបពិភាក្សាជាមួយ​អ្នកជំនួញ និងអ្នកបច្ចេកទេស ក្នុងការពិនិត្យលទ្ធភាពបង្កើតរោងចក្រផលិតជីដ៏ធំមួយ ហើយរដ្ឋនឹងផ្តល់ការឧបត្ថម្ភធន ជួយសម្រួលដល់ការទិញវត្ថុធាតុដើមពីបណ្តាប្រទេសផ្សេងៗមកឱ្យក្រុមហ៊ុននេះ ផលិត។

លោកបានឱ្យដឹងថា ក្រុមហ៊ុននេះនឹងត្រូវក្លាយជាក្រុមហ៊ុន​ភាពជាដៃគូរវាងរដ្ឋនិងឯកជន (PPP)​ ប៉ុន្តែដឹកនាំដោយវិស័យឯកជន ដើម្បីជំរុញការផលិតជី ដែលធានាបាននូវគុណភាព និងតម្លៃសមរម្យជូនកសិករ។​ ហើយក្រុមហ៊ុននេះក៏អាចលក់ប័ណ្ណភាគហ៊ុន ដល់សាធារណជន​ ដើម្បីកៀរគរទុនផងដែរ។

អ្នកឧកញ៉ា លឹម ហេង លើកឡើងបែបនេះ ធ្វើឡើងក្នុងកម្មវិធី ​FRESH BUSINESS​ ពិភាក្សាលើប្រធានបទ៖ «យន្តការលើកកម្ពស់ ផលិតផលក្នុងស្រុក និងភាពប្រឈម»។

សូមស្តាប់ប្រសាសន៍បន្ថែមរបស់ អ្នកឧកញ៉ា លឹម ហេង៖