(បរទេស)៖ ក្រុមហ៊ុន Toyota បានប្រកាសឱ្យដឹងជាផ្លូវការថា លោក Akio Toyoda សម្រេចចិត្តលាឈប់ពីតំណែងនាយកប្រតិបត្តិ និងប្រធានក្រុមហ៊ុន ដើម្បីទៅពង្រីង និងពង្រីកទីផ្សាររថយន្ត Lexus វិញ ជាពិសេសគឺទីផ្សាររថយន្តអគ្គិសនីដែលកំពុងតែពុះកញ្ជ្រោល។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី២៦ ខែមករា ឆ្នាំ២០២៣។
យោងតាមសេចក្ដីប្រកាសរបស់ Toyota បានឱ្យដឹងថា លោក Akio នឹងចុះចេញពីតំណែងទាំងពីរខាងលើនៅថ្ងៃទី០១ ខែមេសាខាងមុខនេះ ខណ:ដែលលោក Koji Sato វ័យ ៥៣ឆ្នាំ ជា Chief Branding Officer នឹងឡើងកាន់តំណែងទាំងពីរបន្ត ហើយលោក Akio នឹងទៅកាន់តំណែងជាប្រធានក្រុមប្រឹក្សាភិបាល និងប្រធានយីហោ Lexus។
លោក Anders Schelde ប្រធានផ្នែកវិនិយោគបាននិយាយថា «គ្មានការសង្ស័យទេ លោក Akio គឺជានាយកប្រតិបត្តិដ៏អស្ចារ្យ ពោរពេញសមត្ថភាព ប៉ុន្តែវិស័យរថយន្តទាំងមូលត្រូវតែធ្វើការផ្លាស់ប្តូរ ហើយក្រុមហ៊ុន Toyota បាននិងកំពុងមានភាពយឺតយ៉ាវក្នុងទស្សនៈរបស់យើង ដូច្នេះវាអាចជាឱកាសសម្រាប់ការចាប់ផ្តើមថ្មី»។
គួរបញ្ជាក់ផងដែរថា លោក Akio Toyoda គឺជាចៅប្រុងបង្កើតរបស់លោក Kiichiro Toyoda ដែលជាស្ថាបនិកបង្កើតក្រុមហ៊ុន Toyoda។ លោក Akio បានចូលបម្រើការងារនៅក្នុងក្រុមហ៊ុន Toyoda នៅឆ្នាំ២០០០ និងត្រូវបានតំឡើងតំណែងជាអនុប្រធានក្រុមហ៊ុននៅឆ្នាំ២០០៥ និងចាប់ផ្ដើមឡើងកាន់តំណែងធំៗជាបន្តបន្ទាប់រហូតក្លាយជា CEO និងប្រធានក្រុមហ៊ុន៕