(ប៊ុយនុសអ៊ែរ)៖ បន្ទាប់ពីបានលើកពាន World Cup ជាលើកដំបូងជាមួយក្រុមជម្រើសជាតិអាហ្សង់ទីននាខែធ្នូឆ្នាំមុន កីឡាករ Lionel Messi បានលើកឡើងថា ការប្រកួតក្នុងព្រឹត្តិការណ៍នេះ អាចជាលើកចុងក្រោយសម្រាប់លោក ប៉ុន្តែឥឡូវនេះវាហាក់បីដូចជាលោកបានបើកចំហចំពោះលទ្ធភាព ក្នុងការលេងនៅព្រឹត្តិការណ៍លំដាប់ពិភពលោកនេះ នាឆ្នាំ២០២៦ ខាងមុខ។ នេះបើយោងតាមសារព័ត៌មាន CNA ចេញផ្សាយនៅថ្ងៃទី០៤ ខែកុម្ភៈ ឆ្នាំ២០២៣។
«ដោយសារតែអាយុ វានឹងក្លាយជាផលវិបាកក្នុងការបង្ហាញខ្លួនលេងនាឆ្នាំ២០២៦» នេះបើតាមសម្តី Messi វ័យ ៣៥ឆ្នាំបានប្រាប់សារព័ត៌មានកីឡាអាហ្សង់ទីន Diario Ole។
«ខ្ញុំចូលចិត្តលេងបាល់ទាត់ ហើយខ្ញុំមានអារម្មណ៍ថា ខ្ញុំមានទម្រង់លេងល្អ ហើយរីករាយជាមួយអ្វីទាំងនេះ។ ខ្ញុំនឹងបន្តរក្សាការលេង។ វាទំនងជារយៈពេលយូរ អាចរហូតដល់ការប្រកួត World Cup បន្ទាប់ ប៉ុន្តែវាអាស្រ័យលើថាតើអាជីពរបស់ខ្ញុំទៅជាយ៉ាងណាដែរ»។
គ្រូបង្វឹកអាហ្សង់ទីន លោក Lionel Scaloni ចង់ឃើញតារាបាល់ទាត់ដែលជាកីឡាករម្នាក់ ក្នុងចំណោមកីឡាករតែ ៦នាក់ប៉ុណ្ណោះដែលបានបង្ហាញខ្លួន ៥លើក លេងក្នុងព្រឹត្តិការណ៍ World Cup រូបនេះ លេងក្នុងព្រឹត្តិការណ៍ World Cup នាពេលខាងមុខ ដែលនឹងធ្វើឡើងនៅសហរដ្ឋអាមេរិក កាណាដា និងម៉ិកស៊ិក។
បន្ទាប់ពីបានស៊ុតបញ្ចូលទី ៧គ្រាប់ក្នុងព្រឹត្តិការណ៍ World Cup ក្នុងឆ្នាំ២០២២ Messi អាចក្លាយជាកីឡាកររកបានគ្រាប់បាល់នាំមុខគេនៅគ្រប់ការប្រកួតទាំងអស់ នៅ World Cup ប្រសិនបើលោកអាចលេងក្នុងឆ្នាំ២០២៦។ លោកបានស៊ុតបញ្ចូលទី ១៣គ្រាប់ នៅខ្វះ ៣គ្រាប់នៅពីក្រោយកីឡាករកាន់កំណត់ត្រា Miroslav Klose របស់អាល្លឺម៉ង់៕