(បរទេស)៖ បន្ទាប់ពីការពន្យារពេលតាំងពីឆ្នាំ២០២១ ដោយសារជំងឺរាតត្បាតកូវីដ-១៩ នៅពេលនេះមានការប្រកាសថា កម្មវិធីប្រឡងបវរកញ្ញាពិភពលោកឆ្នាំនេះ នឹងត្រូវធ្វើឡើង ខណៈអ្នកឈ្នះមកុដត្រូវបានគេអះអាងថា នឹងទទួលបានប្រាក់រង្វាន់រហូតដល់១លានដុល្លារ។
បើតាមអ្នករៀបចំកម្មវិធី «Miss World» បានឲ្យដឹងថា ខ្លួននឹងរៀបចំកម្មវិធីប្រឡងបវរកញ្ញាពិភពលោកលើកទី៧១នេះ នៅខែឧសភា ឆ្នាំ២០២៣ខាងមុខ។ តែយ៉ាងណា ជុំវិញដំណឹងនេះ ក៏មានពាក្យចចាមអារ៉ាមថា អ្នកឈ្នះ ឬអ្នកគ្រងមកុដនឹងទទួលបានប្រាក់សុទ្ធ១លានដុល្លារ ដែលនឹងគឺខុសពីការអនុវត្តរាល់ឆ្នាំ ត្បិតកន្លងទៅអ្នកឈ្នះនឹងទទួលបានប្រាក់ឧបត្ថម្ភប្រចាំខែ ប្រៀបដូចប្រាក់ខែរហូតដល់ចប់រដូវកាលមិនថាយូរឬឆាប់នោះឡើយ។
ក្រៅពីរង្វាន់សាច់ប្រាក់នេះ ក៏មានពាក្យចចាមអារ៉ាមទៀតថា អ្នកឈ្នះនឹងចុះហត្ថលេខាលើកិច្ចសន្យាការងារជាមួយហូលីវូដ ដែលជាផ្នែកនៃកញ្ចប់រង្វាន់របស់ម្ចាស់មកុដផងដែរ។ នាងក៏នឹងរីករាយនឹងដំណើរទេសចរណ៍ពិភពលោក សម្រាប់កម្មវិធីសប្បុរសធម៌ និងព្រឹត្តិការណ៍នានា ព្រមទាំងទទួលបានម៉ាកយីហោប្រណីតៗ ទទួលរូបនាងធ្វើជាទូតសុច្ឆន្ទៈផងដែរ។ ជាងនេះទៅទៀត នាងនឹងទទួលបានផ្ទះប្រណិតមួយក្នុងទីក្រុងឡុងដ៍។
ស្របពេលដែល «Miss Universe» ដែលជាកម្មវិធីប្រកួតបវរកញ្ញាមួយនោះ មានម្ចាស់ថ្មី ងាកមកកម្មវិធី «Miss World» ដែលជាកម្មវិធីស្រដៀងគ្នានេះ ក៏មានពាក្យចចាមអារ៉ាមថា នឹងមានសហម្ចាស់ថ្មីដែរ។ អ្នកជំនួញជនជាតិអង់គ្លេស Dipendra Gulung ដែលជាម្ចាស់ក្រុមហ៊ុនយន្តហោះ Himalayan និងរោងកុនប្រណិត Privé ទូទាំងពិភពលោក គឺជាសហកម្មសិទ្ធនៃកម្មវិធីនេះ។ តែយ៉ាងណា ទាំងនេះគ្រាន់ជាពាក្យចចាមអារាមប៉ុណ្ណោះ ហើយប្រសិនបើដំណឹងនេះជាការពិតមែននោះ អង្គភាពមួយនេះ នឹងប្រកាសជាផ្លុវការក្នុងពេលឆាប់ៗនេះជាក់ជាមិនខាន៕