(ភ្នំពេញ)៖ ក្រុមហ៊ុន មេនូឡាយហ្វ៍ ខេមបូឌា (Manulife Cambodia) ដែលជាក្រុមហ៊ុនធានារ៉ាប់រងអាយុជីវិតអន្តរជាតិដំបូងបង្អស់នៅកម្ពុជា បានរៀបចំកម្មវិធីរាត្រីសមោសរ ដើម្បីអបអរសារទរសមិទ្ធផលប្រចាំត្រីមាសទី៤ ឆ្នាំ ២០២២ ក្រោមការសហការយ៉ាងជិតស្និទ្ធជាមួយដៃគូយុទ្ធសាស្ត្រ ធនាគារ ABA ដែលជាធនាគារពាណិជ្ជ និងធនាគារឌីជីថលធំជាងគេនៅកម្ពុជា។
លើសពីនេះទៀត កម្មវិធីនេះក៏ត្រូវបានរៀបចំឡើងដើម្បីប្រគល់ពានរង្វាន់ និងការទទួលស្គាល់ដល់បុគ្គលិកជំនាញប្រឹក្សាធានារ៉ាប់រងឆ្នើម ក៏ដូចជាបុគ្គលិកធនាគារ ABA សរុបជិត ២០០នាក់ ដែលសម្រេចបានដោយជោគជ័យនូវយុទ្ធនាការត្រីមាសទី៤ ឆ្នាំ២០២២ នេះ។ សមិទ្ធផលនេះក៏បានឆ្លុះបញ្ចាំងពីកិច្ចខិតខំប្រឹងប្រែង និងការចូលរួមចំណែករបស់បុគ្គលិកនៃស្ថាប័នទាំង២ ក្នុងការផ្តល់ប្រឹក្សាយោបល់ប្រកបដោយគុណភាព និងវិជ្ជាជីវៈខ្ពស់ ក្នុងការផ្តល់សេវាកម្មដ៏ល្អ និងដំណោះស្រាយផ្នែកហិរញ្ញវត្ថុជូនដល់ក្រុមគ្រួសារកម្ពុជា។
លោក ព្រូ ស៊ីថន នាយកគ្រប់គ្រងនាយកដ្ឋានភាពជាដៃគូនៃក្រុមហ៊ុន មេនូឡាយហ្វ៍ ខេមបូឌា បានសម្តែងការកោតសរសើរថា «ខ្ញុំបាទពិតជាមានមោទនភាពណាស់ចំពោះការជួបជុំមួយនេះដែលរៀបចំឡើង ដើម្បីរឹតចំណងមិត្តភាពការងារ ការថ្លែងអំណរគុណ និងការទទួលស្គាល់ចំពោះបុគ្គលិកឆ្នើមនៃស្ថាប័នទាំង២។ ក្រោមការសហការយ៉ាងជិតស្និទ្ធជាមួយធនាគារ ABA ដែលជាដៃគូយុទ្ធសាស្ត្ររបស់យើង ខ្ញុំជឿជាក់ថាគ្រួសារកម្ពុជាកាន់តែច្រើនឡើងនឹងទទួលបាននូវការការពារផ្នែកហិរញ្ញវត្ថុមួយដ៏រឹងមាំ សេវាកម្មល្អ ប្រកបដោយទំនុកចិត្តខ្ពស់។ ជាក់ស្តែង Manulife នៅតែបន្តរក្សាតំណែងលេខ “១” ក្នុងនាមជាក្រុមហ៊ុនដែលមានចំណែកទីផ្សារច្រើនជាងគេនៅកម្ពុជាក្នុងឆ្នាំ ២០២២ (សម្រាប់បុព្វលាភធានារ៉ាប់រងឆ្នាំដំបូង) ហើយក្រុមហ៊ុនបានផ្តល់ទឹកប្រាក់ជូនចំពោះអតិថិជនដែលមានបណ្ណសន្យារ៉ាប់រងដល់កាលកំណត់សរុបជិត ៨ម៉ឺនដុល្លារអាមេរិកក្នុងឆ្នាំ២០២២ និងបន្តផ្តល់ជូនប្រមាណ ១លានដុល្លារអាមេរិកក្នុងឆ្នាំ២០២៣ នេះ។ ដោយឡែកសម្រាប់អតិថិជនធនាគារ ABA តាំងពីឆ្នាំ ២០១៦ មក ក្រុមហ៊ុន មេនូឡាយហ្វ៍ បានផ្តល់សំណងធានារ៉ាប់រងជូនអតិថិជនចំនួន ២០២នាក់ គិតជាទឹកប្រាក់សរុបចំនួនជាង ១លានដុល្លារអាមេរិក»។
គួរបញ្ជាក់ផងដែរថា កិច្ចសហការរវាងស្ថាប័នហិរញ្ញវត្ថុឈានមុខគេទាំងពីរនេះបានចាប់ផ្តើមឡើងតាំងពីឆ្នាំ២០១៦ មក ក្នុងនាមជាដៃគូចែកចាយផលិតផលធានារ៉ាប់រងអាយុជីវិតតាមបណ្តាញធនាគារ (Bancassurance partner)។ ក្រោយមកស្ថាប័នទាំងពីរក៏បានសហការគ្នាជាថ្មីម្តងទៀតក្នុងឆ្នាំ ២០១៩ ក្នុងការផ្តល់សេវាកម្មបង់បុព្វលាភធានារ៉ាប់រងដល់អតិថិជន មេនូឡាយហ្វ៍ តាមរយៈកម្មវិធី ABA Mobile និងបង្កើតផលិតផលធានារ៉ាប់រងអាយុជីវិតឌីជីថលដំបូងបង្អស់នៅកម្ពុជាឈ្មោះថា «Manulife សុខសប្បាយ» ក្នុងឆ្នាំ ២០២២។
សម្រាប់ព័ត៌មានថ្មីៗពីក្រុមហ៊ុន មេនូឡាយហ្វ៍ ខេមបូឌា សូមតាមដានទំព័រហ្វេសប៊ុក «Manulife Cambodia» តាមរយៈ www.facebook.com/ManulifeKH ឬចូលទៅកាន់គេហទំព័រ www.manulife.com.kh៕
