(ភ្នំពេញ)៖ បន្ទាប់ពីដល់ឆ្នាំត្រូវផុតកំណត់កិច្ចសន្យា ជាមួយនឹងផលិតកម្ម សាស្ត្រាហ្វីម តារាសម្ដែងបែបយុវវ័យ និងច្រើនតែទទួលបានតំណែងជាតួឯកលោក ម៉ឺនឯក សុភារិទ្ធ បានសម្រេចចាកចេញពីផលិតកម្មនេះហើយ ដោយមិនបន្តកិច្ចសន្យាជាថ្មីទៀតនោះទេ ហើយបានធ្វើការប្រកាសថា សុខចិត្តធ្វើជាតារាឯករាជ្យ ដោយមិនចូលរួមក្នុងផលិតកម្មណាមួយឡើយ។
តារាសម្ដែង ម៉ឺនឯក សុភារិទ្ធ បានថ្លែងប្រាប់ Fresh News Plus ឲ្យដឹងនៅថ្ងៃនេះថា ចំពោះដំណឹងនៃការចាកចេញពីផលិតកម្ម សាស្ត្រាហ្វីម គឺជាការពិត ដោយលោកបានសម្រេចមិនបន្តកិច្ចសន្យាទៀតទេ ព្រោះតែលោកចង់ធ្វើជាតារាសម្ដែងឯករាជ្យ និងស្វាគមន៍គ្រប់ផលិតករទាំងអស់ ដែលចង់ទាក់ទងរូបលោកឲ្យចូលសម្ដែង ក្នុងរឿងណាមួយ។
លោក ម៉ឺនឯក សុភារិទ្ធ និយាយថា «បាទបង..! ខ្ញុំបានបញ្ចប់កុងត្រា ជាមួយផលិតកម្ម Sastrafilm ហើយ ព្រោះដល់ឆ្នាំត្រូវផុតកុងត្រា ហើយខ្ញុំសម្រេចចិត្តមិនបន្តកុងត្រាទៀត ព្រោះចង់ឯករាជ្យ។ តែបើផលិតកម្ម Sastrafilm ហៅថត ខ្ញុំនិងស្វាគមន៍ជានិច្ច។ ដូច្នេះសម្រាប់ផលិតករ ឬផលិតកម្មផ្សេងៗ ដែលចង់ហៅខ្ញុំថត ខ្ញុំបាទស្វាគមន៍ និងទទួលថតធម្មតា មិនថាថតរឿងភាគ រឿងខ្លី ឬស្ពតពាណិជ្ជកម្មទេ ខ្ញុំទទួលទាំងអស់!»។
តារាសម្ដែងវ័យក្មេង ម៉ឺនឯក សុភារិទ្ធ ត្រូវបានមហាជនមើលឃើញថា លោកមានទេពកោសល្យនៃការសម្ដែងល្អ រហូតទទួលបានតំណែងជាតួឯកស្ទើរគ្រប់រឿង។ តាមរយៈផលិតកម្ម សាស្ត្រាហ្វីម និងផលិតកម្មមួយចំនួនទៀត តារាសម្ដែង ម៉ឺនឯក សុភារិទ្ធ អាចទទួលបាននូវបទពិសោធសម្ដែង បានយ៉ាងជ្រាលជ្រៅក្នុងការងារសិល្បៈ ហើយតារារូបនេះ ក៏មានអាជីពជាពិធីករមួយទៀតផងដេរ។
សូមបញ្ជាក់ថា ស្នាដៃមួយចំនួនដែលតារាសម្ដែង ម៉ឺនឯក សុភារិទ្ធ បានសាងឡើងនៅក្នុងផលិតកម្ម សាស្ត្រាហ្វីម មានដូចជា រឿង «កូនគ្នានខាន់ស្លា, សត្រូវកំពូលស្នេហ៍, សុំឪកាសសារភាពស្នេហ៍, ប៉ា២ជើងល្អ, ប៉ាបវរកញ្ញា, បងប្អូន, ទឹកសាប, សង្គ្រាមបងប្អូន, កាំជណ្ដើរទី៣, Black Love, Game ស្នេហ៍សងសឹក និងភាពយន្តមួយចំនួនទៀត៕