(អាមេរិក)៖ តារាសម្តែងដែលដើរតួអង្គ Kang ក្នុងភាពយន្ត «Marvel Cinematic Universe» គឺលោក Jonathan Majors ត្រូវបានចោទប្រកាន់ពីបទ រំលោភបំពានរូបរាងកាយ និងត្រូវបានប៉ូលីសក្រុង New York ឃាត់ខ្លួននាពេលថ្មី២នេះ។ នេះបើតាមការចេញផ្សាយរបស់សារព័ត៌មាន CNA នៅថ្ងៃទី២៧ ខែមីនា ឆ្នាំ២០២៣។
នាយកដ្ឋានប៉ូលីសទីក្រុងញូវយ៉ក (NYPD) បាននិយាយថា Majors ដែលជាតារានៃ Creed III និង Ant-«Man and The Wasp: Quantumania» បានជាប់ពាក់ព័ន្ធក្នុងជម្លោះមួយ ជាមួយស្ត្រីអាយុ ៣០ឆ្នាំ។ អ្នកនាំពាក្យរបស់ NYPD បាននិយាយនៅក្នុងសេចក្តីថ្លែងការណ៍មួយថា «ជនរងគ្រោះបានប្រាប់ប៉ូលីសថា នាងត្រូវបានគេវាយដំ» ។ លោកបានបន្តថា «មន្ត្រីបានដាក់បុរសអាយុ ៣៣ឆ្នាំ ទៅឃុំខ្លួនបណ្ដោះអាសន្ន។ ជនរងគ្រោះបានរងរបួសក្បាល និងកបន្តិចបន្តួច ហើយត្រូវបានគេបញ្ជូនទៅកាន់មន្ទីរពេទ្យនៅក្បែរតំបន់នោះ។ ទោះជាបែបនេះក្តី តារាប្រុសវ័យ៣៣ឆ្នាំរូបនេះ ត្រូវបាដោះលែងវិញ នៅយប់ថ្ងៃសៅរ៍កន្លងទៅនេះ។
ជុំវិញបញ្ហានេះ តំណាងឲ្យ Majors បដិសេធចំពោះការប្រព្រឹត្តខុសរបស់តារាសម្ដែង។ «លោកមិនបានធ្វើអ្វីខុសនោះទេ» នេះបើតាមអ្នកតំណាងតារារូបនេះ បាននិយាយតាមអ៊ីមែលទៅកាន់ AP កាលពីថ្ងៃសៅរ៍។
គួរជម្រាបថា តារាសម្តែងអាមេរិក Majors គឺជាតារាដែលឆាប់មានភាពល្បីល្បាញលឿនបំផុតនៅហូលីវូដ។ បន្ទាប់ពីបានចូលរួមក្នុងរឿង «The Last Black Man» ឆ្នាំ២០១៩ មក Majors បានសម្តែងក្នុងរឿង «Da 5 Bloods«, រឿង «The Harder They Fall» និងរឿង «Devotion» កាលពីឆ្នាំមុន។ លោកក៏ដើរតួក្នុងកម្មវិធីមហោស្រពភាពយន្ត «Sundance» ថ្មីៗនេះ ទស្សនាវដ្តី Dreams ដែល Searchlight Pictures នឹងចេញផ្សាយនៅខែធ្នូផងដែរ៕