(ភ្នំពេញ)៖ គ្រូពេទ្យនៃមន្ទីរពេទ្យ Japan Eye Hospital Cambodia បានថ្លែងថា នៅពេលដែលកូនរបស់អ្នកមានអាយុ ៣ឆ្នាំ សូមនាំកូនទៅជួបជាមួយគ្រូពេទ្យឯកទេសខាងភ្នែក ឬពិនិត្យមុនពេលកុមារ ចាប់ផ្តើមចូលរៀន ពិសេសប្រសិនបើការមើលឃើញកូនរបស់អ្នកមិនសូវល្អ វាអាចដោយសារតែគាត់កំពុងមានបញ្ហា ម្ញូបជិត(Myopia) ឬ ម្ញូបឆ្ងាយ (hyperopia) និងអាចជា Astigmatism ជាដើម។
សូមអនុវត្តទៅតាមការណែនាំរបស់គ្រូពេទ្យភ្នែក ដើម្បីព្យាបាល ឬតាមដានបន្ថែមទៀត។ បន្ទាប់ពីនោះ សូមយកកូនរបស់អ្នកមកពិនិត្យភ្នែកម្ដងទៀត នៅពេលដែលគាត់មានអាយុ ៦ឆ្នាំ បើទោះបីជាការមើលឃើញរបស់គាត់មានលក្ខណៈប្រក្រតីក៏ដោយ។
បន្ទាប់ពីគាត់មានអាយុ ៦ឆ្នាំ សូមយកគាត់មកពិនិត្យជាមួយគ្រូពេទ្យភ្នែកឲ្យបានទៀងទាត់រៀងរាល់ ១ឆ្នាំម្តង។ ប៉ុន្តែប្រសិនបើការមើលឃើញកូនរបស់អ្នកមិនល្អ សូមយកគាត់មកពិនិត្យជាមួយគ្រូពេទ្យភ្នែក ឲ្យបានទៀងទាត់រៀងរាល់ ៣ខែម្តង។ការពិនិត្យនេះ ដើម្បីពិនិត្យរកមើលចក្ខុវិស័យ ថាមានការថយចុះនៃគំហើញឬអត់។
តើគួរតែមានការបង្ការបែបណា ដើម្បីកុំឲ្យកុមារមានម្ញូបជិត (Myopia)? ប្រសិនបើមានបញ្ហានេះហើយ តើគួរព្យាបាលបែបណាដែរ? ជាការពិតណាស់ ថ្នាំបន្តក់ភ្នែកមួយប្រភេទដែលយើងហៅថា Atropine 0.01% គឺមានភស្តុតាងបង្ហាញឱ្យឃើញថា វាមានប្រសិទ្ធភាពសម្រាប់ក្មេងដែលមានបញ្ហាភ្នែកម្ញូប (Myopia) ពិតមែន។ ហើយក៏មានវ៉ែនតាដែលអាចជួយគ្រប់គ្រងការវិវត្តរបស់ភ្នែកម្ញូប (Myopia) និងវីតាមីនផ្សេងៗដើម្បីបង្ការកុំឱ្យមានភ្នែកម្ញូប (Myopia)ផងដែរ។
យ៉ាងណាមិញ មកដល់ពេលនេះ គឺមិនទាន់មានវិធីបង្ការណាមួយដែលច្បាស់លាស់១០០ភាគរយនៅឡើយទេ។ ទោះបីជាកូនរបស់អ្នកមានភ្នែកម្ញូប (Myopia) ក៏ដោយសូមកុំព្រួយបារម្ភឡើយវាមិនអីទេ ប្រសិនបើកូនរបស់អ្នកអាចមើលឃើញយ៉ាងច្បាស់នៅពេលដែលប្រើប្រាស់វ៉ែនតា។
យ៉ាងណាមិញចំពោះអ្នកដែលមានភ្នែកម្ញូបកម្រិតខ្ពស់ (High Myopia) គឺនឹងមានហានិភ័យជាច្រើន។ ដោយសារតែភ្នែកម្ញូបកម្រិតខ្ពស់ (High Myopia) អាចបណ្តាលអោយគំហើញចុះខ្សោយបន្តិចម្តងៗ ទោះបីជាប្រើប្រាស់វ៉ែនតាក៏ដោយ។ «នេះហើយជាហេតុផល ដែលខ្ញុំគិតថាការគ្រប់គ្រងការវិវត្តរបស់ភ្នែកម្ញូប (Myopia) គឺសំខាន់បំផុតក្នុងវ័យកុមារភាព។ មានអ្នកខ្លះទៀត មិនអាចមើលឃើញសោះតែម្តង សូម្បីតែនៅក្នុងកន្លែងដែលមានពន្លឺគ្រប់គ្រាន់ក៏ដោយ»។ នេះតាមការបញ្ជាក់របស់គ្រូពេទ្យនៃមន្ទីរពេទ្យ Japan Eye Hospital Cambodia។
មន្ទីរពេទ្យឯកទេសភ្នែកមួយនេះ បានបញ្ជាក់ទៀតថា មានរោគសញ្ញាដែលយើងបានកត់សម្គាល់ ដូចជាភ្នែកសងខាងបែរចូលក្នុង ឬស្រលៀងចូល និងភ្នែកសងខាងបែរចេញក្រៅ ឬស្រលៀងចេញ ដោយគ្រាន់តែប្រើប្រាស់ទូរសព្ទតែប៉ុណ្ណោះ។ នេះជាហេតុផលដែលចង់ណែនាំ កុំឱ្យប្រើទូរស័ព្ទខ្លាំងពេក៕