(ភ្នំពេញ)៖ នៅក្នុងពិភពសិល្បៈ នរណាដែលថាមិនស្គាល់ Pey Pey Dy? គ្រាន់តែឮឈ្មោះ Pey Pey Dy ភ្លាម ទាំងក្មេងទាំងចាស់ ដកកចំហរមាត់ នឹកដល់ភាពកំប្លុកកំប្លែង សម្តីចាក់ថាឲ្យគ្នា ចំអែចំអន់ បាញ់គ្នា ផ្អើលអស់បណ្តាញសង្គមហ្វេសប៊ុក និង TikTok ភ្លាម។ សម្រាប់តារាកំប្លែង និងសម្ដែងរូបនេះ ត្រូវបានមហាជនដឹងថា ប្រឡូកក្នុងវិថីសិល្បៈជាង ១០ឆ្នាំកន្លងមកហើយ និងជាប់ឈ្មោះជាតារាពហុជំនាញ ពោលគឺជា តារាហ្វេសប៊ុក តារាតិកតុក តួសម្តែង តួកំប្លុកកំប្លែង ពិធីករ តារាចម្រៀង អ្នកសរសេរសាច់រឿង ក៏ដូចជាអ្នកដឹកនាំថត និងសម្តែងខ្លួនឯងផងដែរ។

កេរ្តិ៍ឈ្មោះតារាកំប្លែង Pey Pey Dy កាន់តែល្បីសុះសាយ និងចាក់ស្រែះនៅក្នុងក្រអៅបេះដូងអ្នកគាំទ្រ ពីមួយថ្ងៃទៅមួយថ្ងៃ មិនចេះជិនណាយ ដោយសារតែភាពប៉ិនប្រសប់បែបកំប្លុកកំប្លែង ផ្គួបផ្សំនឹងទេពកោសល្យ ពីសិល្បៈតាំងពីកំណើត និងវោហាស័ព្ទចាក់ទឹកមិនលិច មិនដែលចាញ់គេ។ Pey Pey Dy បានឲ្យដឹង លោកបានផ្តើមបង្កើតមាតិកាវីដេអូដំបូង នៅអំឡុងឆ្នាំ២០១៣ តាមរយៈការសម្តែងជាតួអង្គពីរក្នុងវីដេអូឃ្លីបតែមួយ ពោលគឺបែបសន្ទនាគ្នា ឬថាឲ្យគ្នាទៅវិញទៅមក ហើយជូនកាលក៏កាត់តវិដេអូអ្នកផ្សេង យកមកនិយាយឆ្លើយឆ្លងគ្នា ដើម្បីធ្វើឲ្យប្លែកអារម្មណ៍អ្នកទស្សនា។

ថ្លែងប្រាប់ Fresh News Plus តារាកំប្លែងលោក Pey Pey Dy បាននិយាយបន្ថែមថា «ខ្ញុំសរសើខ្លួនឯង ដែលខ្ញុំអាចធ្វើបាន និងបត់បែនគ្រប់ទម្រង់នៃសិល្បៈ និន្នាការសង្គម ទទួលយកមតិរះគន់ដើម្បីស្ថាបនា ហើយមិនដែលចុះចាញ់នឹងរួញរាចំពោះកិច្ចការងារសិល្បៈ ដែលជាចំណង់ចំណូលចិត្តរបស់ខ្ញុំតាំងពីតូចមកម្ល៉េះ»។

បច្ចុប្បន្នតារាសម្ដែង និងកំប្លែង Pey Pey Dy កំពុងកាក់កបខ្លាំងលើមុខជំនួញលក់ជ្រក់ជើងទា កិច្ចការងារសិល្បៈ ថតស្ពតពាណិជ្ជកម្ម ផ្សព្វផ្សាយផលិតឲ្យ ក្រុមហ៊ុនល្បីៗទាំងក្នុងនិងក្រៅស្រុក និងលេចមុខលើឆាកតន្ត្រី និងប៉ុស្តិ៍ទូរទស្សន៍នានា គួរឲ្យកត់សម្គាល់។ ជាក់ស្តែងពីពេលថ្មីៗនេះ តារាសម្ដែង Pey Pey Dy  ត្រូវបានក្រុមហ៊ុន JUSTEEN MIRACLE ចូលចែចូវឲ្យធ្វើជាទូតសុច្ឆន្ទៈថែមទៀតផង។

ភាពជោគជ័យរបស់តារាកំប្លែង Pey Pey Dy បានផ្លាស់ប្តូរ ជោគវាសនានៃការរស់នៅ ពីផ្ទះទ្រនំតូច មកក្លាយជាវីឡាស្កឹមស្កៃ ជីវិតហាយសូរ ជិះឡានថ្មីស៊េរីទំនើបៗ និងកាន់តែល្បីឈ្មោះសុះសាយ នៅក្នុងសង្គមសិល្បៈ។

សូមរំឭកថា តារាសម្ដែងបែបកំប្លែង Pey Pey Dy មានឈ្មោះពិតថា សេម ឡុងឌី ដែលបានវិវឌ្ឍន៍ខ្លួនពីតារាហ្វេសប៊ុក ទៅជាតារាពហុជំនាញ ជាមួយនឹងសមត្ថភាពដឹកនាំរឿង និងសម្រេចបាននូវសមិទ្ធផល ស្នាដៃសិល្បៈជាបន្តបន្ទាប់ រួមមានរឿង «ខ្មោចនាងភូមិរី» ចាក់ Premiere នៅរោងកុន Major Cineplex ផ្សារទំនើបអ៊ីអន១, រឿង «ប្រម៉ាត់ប្រម៉ង់», រឿង «វិញ្ញាខ្មោច៧ថ្ងៃ», រឿង «កែវណាម៉ាធីតាមុខសេះ», រឿង «នាងនាដឆ្លងជាតិ», រឿង «ទូរសព្ទផ្តាច់ព្រលឹង» និងរឿង «ខ្មោចយាមផ្ទះ» ជាដើមដែលបង្ហោះលើ You Tube ផ្ទាល់របស់លោកជូនមហាជនទស្សនា៕