(ឡុងដ៏)៖ ក្រុមបាល់ទាត់តោខៀវ Chelsea FC បានឡើងវគ្គផ្តាច់ព្រ័ត្រពានរង្វាន់ក្របខណ្ឌលីគ EFL Cup 2023-24 ក្រោយពេលយកឈ្នះក្រុម Middlesbrough ៦-១ ក្នុងជើងទី២ ខណៈអ្នកចាត់ក្រុមលោក Mauricio Pochettino បាននិយាយថា «មានការអស់សង្ឃឹមក្នុងការឈ្នះពានក្របខណ្ឌលីគអង់គ្លេស» ដ្បិតបានដឹកនាំក្រុមពីចំណុចសូន្យឈានទៅវគ្គផ្តាច់ព្រ័ត្រ។

ក្រុមតោខៀវ Chelsea បានលេងចាញ់នៅជើងទី១ លទ្ធផល ១-០ ខណៈបានកសាងជ័យជម្នះមកវិញនៅជើងទី២ លទ្ធផល ៦-១ ទៅក្រុមលេងនៅលីគ Championship ក្រុម Middlesbrough ក្នុងកីឡដ្ឋាន Stamford Bridge នៅពីមុខអ្នកគាំទ្រប្រមាណ ៣៧,៧៥៤នាក់។

Chelsea ត្រូវរង់ចាំក្រុមឈ្នះរវាងក្រុម Liverpool ឬក្រុម Fulham ដ្បិតក្រុមហង្សក្រហម Liverpool បានយកឈ្នះជើងទី១ លទ្ធផល ២-១ រួចមកហើយដែរ, ជាមួយជំនួបនេះនឹងធ្វើឡើងនៅរាត្រីថ្ងៃទី២៤ ខែមករានេះ។

សម្រាប់វគ្គផ្តាច់ព្រ័ត្រនិងធ្វើឡើងនៅកីឡដ្ឋាន Wembley នាថ្ងៃទី២៥ ខែកុម្ភៈ ហើយវាបានក្លាយជាការប្រកួតវគ្គផ្តាច់ព្រ័ត្រពានរង្វាន់ទី១ របស់ក្រុម Chelsea ខណៈពួកគេមានប្រវត្តិធ្លាប់បានចាញ់ Liverpool នៅក្នុងការប្រជែងពាន EFL Cup និង FA Cup ដោយការស៊ុតបាល់ ១១ម៉ែត្រកាលឆ្នាំ២០២២។

រំលឹកផងថា លោក Pochettino មិនទាន់បានលើកពាននៅក្របខណ្ឌលីគអង់គ្លេស នោះទេ ដែលបានចាញ់ក្នុងវគ្គផ្តាច់ព្រ័ត្រនៃការប្រកួតនេះក្រោមស្នាដៃក្រុម Chelsea ក្នុងឆ្នាំ២០១៥ និងវគ្គផ្តាច់ព្រ័ត្រ Champions League ក្រោមស្នាដៃ Liverpool ក្នុងឆ្នាំ ២០១៩ ពេលលោកកាត់តួនាទីអ្នកចាត់ការ Tottenham Hotspur ៕