(ភ្នំពេញ)៖ បន្ទាប់ពីខកខានបោះឆ្នោតជ្រើសរើសប្រធានថ្មី កាលពីអាណត្តិមុនកន្លងទៅ ដោយសារតែវិបត្តិនៃជំងឺកូវីដ-១៩, នៅឆ្នាំ២០១៤នេះ សមាគមសិល្បករខ្មែរ ដែលមានអ្នកនាង ចន ច័ន្ទលក្ខិណា ជាប្រធាន បានប្រកាសនៅថ្ងៃនេះថា សមាគមនឹងរៀបចំការបោះឆ្នោតជ្រើសរើសប្រធានថ្មី នៅពេលឆាប់ៗខាងមុខនេះ ដើម្បីរកអ្នកបន្តដឹកនាំសមាគម ទៅថ្ងៃអនាគត ស្របតាមលក្ខន្តិកៈដែលសមាគមមាន និងទទួលស្គាល់ដោយក្រសួងមហាផ្ទៃ។ ក្នុងនោះសមាគមក៏បានបើកឱកាស ដល់សិល្បករ-សិល្បការិនីរៀមច្បង ដែលមានបំណងចង់ធ្វើប្រធានថ្មី ដើម្បីបានឈរឈ្មោះបោះឆ្នោត និងទទួលបានសំឡេងច្រើនលើសលប់ ពីសមាជិករបស់ខ្លួន។
ប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានថ្លែងបញ្ជាក់ក្នុងបណ្ដាញសង្គមផ្លូវការរបស់ខ្លួនថា «ក្នុងនាមសមាគមសិល្បករខ្មែរ នាងខ្ញុំមានកិត្តិយស សូមគោរពជម្រាបជូនលោកជំទាវម៉ែ ហ៊ុន ស៊ីណាត និង បងប្អូនសិល្បករ-សិល្បការិនី ក៏ដូចជាសាធារណជនទាំងអស់មេត្តាជ្រាបថា យោងតាមលក្ខន្តិកៈរបស់សមាគមសិល្បករខ្មែរ ដែលទទួលស្គាល់ដោយក្រសួងមហាផ្ទៃ ការបោះឆ្នោតជ្រើសរើសប្រធានសមាគមមានអាណត្តិ ៥ឆ្នាំម្តង។ ដោយឡែកសម្រាប់អាណត្តិនាងខ្ញុំចាប់ផ្ដើមពីថ្ងៃទី០៧ ខែកក្កដា ឆ្នាំ ២០១៧ រហូតមកដល់ពេលនេះមានរយៈពេលជាង ៦ឆ្នាំហើយ។ នោះក៏ព្រោះតែឆ្នាំទី៥ដែលត្រូវបោះឆ្នោត គឺជាពេលវេលាកំពុងមានវិបត្តិធ្ងន់ធ្ងរនៃជំងឺកូវីដ-១៩ រាជរដ្ឋាភិបាលមិនអនុញ្ញាតឲ្យមានការជួបជុំឡើយ ទើបថ្នាក់ដឹកនាំរបស់សមាគម សម្រេចពន្យាពេលបោះឆ្នោតអណត្តិថ្មី រហូតមកដល់បច្ចុប្បន្ន»។
អ្នកនាង ចន ច័ន្ទលក្ខិណា បានបន្តទៀតថា «ទោះបីជាយ៉ាងណា សមាគមកំពុងធ្វើការជាមួយស្ថាប័នដែលពាក់ព័ន្ធ ដើម្បីរៀបចំការបោះឆ្នោតអាណត្តិថ្មីនៅក្នុងឆ្នាំនេះ។ សមាគមសូមស្វាគមន៍យ៉ាងកក់ក្តៅ ចំពោះរៀមច្បងសិល្បករ និងបងប្អូនសិល្បករ សិល្បការិនីទូទៅ ដែលមានបំណងចង់ឈរឈ្មោះបោះឆ្នោត ដើម្បីបន្តដឹកនាំសមាគមសិល្បករខ្មែរក្នុងអាណត្តិថ្មី ឲ្យកាន់តែរីកចម្រើន សំដៅគាំពារដល់សិល្បករគ្រប់ទម្រង់ ជាពិសេសសិល្បករចាស់ជរា មានពិការភាព និងមានជីវភាពខ្វះខាតជាដើម»។
ជាមួយនឹងការប្រកាសជាផ្លូវការនេះ អ្នកនាង ចន ច័ន្ទលក្ខិណា ក៏បានដាក់នូវលេខទូរស័ព្ទ ដើម្បីទាក់ទងសួរបញ្ជាក់នូវព័ត៌មានលម្អិត តាមរយៈលេខ ០១៧ ៩៩០ ៣៣២។ ជាមួយគ្នានេះអ្នកនាង ចន ច័ន្ទលក្ខិណា ក៏សូមគោរពអរគុណដល់ថ្នាក់ដឹកនាំ និងបងប្អូនសិល្បករទាំងអស់ ដែលបានគាំទ្ររូបនាងធ្វើជាប្រធាននាពេលកន្លងមក៕