(ភ្នំពេញ)៖ ក្រុមបាល់ទាត់ព្រះខ័នរាជស្វាយរៀង បានគ្រងជើងឯកពានរង្វាន់បើករដូវកាលថ្មី Cambodian Super Cup 2024 ក្រោយយកឈ្នះក្រុមជើងឯក ២សម័យភ្នំពេញក្រោន ដោយលទ្ធផល ២-១ ក្នុងជំនួបនៅពហុកីឡដ្ឋានជាតិ នៅល្ងាចថ្ងៃទី០៤ ខែសីហា ឆ្នាំ២០២៤ ។

ការប្រកួតដ៏ជក់ចិត្តរវាងក្រុមទាំងពីរ ក្រុមជើងឯកលីគកំពូលកម្ពុជា និងពានសម្ដេចតេជោ ហ៊ុន សែន ព្រះខ័នរាជស្វាយរៀង បានបើកការនាំមុខក្រុមសិង្ហក្រុម ១គ្រាប់មុន នៅវគ្គទី១ ដោយកីឡាករ Pablo Augusto នៅនាទី២៦ មុនបាត់បង់សមាជិកម្នាក់ គឺកីឡាករ Gabriel Silva Costa ក្រោយទទួលការពិន័យកាតក្រហម បន្ទាប់ពីបង្កកំហុសលើកីឡាករភ្នំពេញក្រោន នៅនាទី៣០ ។

ចូលវគ្គទី២ ភ្នំពេញក្រោន បានព្យាយាមវាយសម្រុកខ្លាំង រហូតវាយបកតាមស្មើវិញ នៅនាទី៦០ ពីការទាត់បាល់ហ្វ្រីឃីតយ៉ាងល្អរបស់កីឡាករសញ្ជាតិខ្មែរ Yudai Ogawa ។ បន្ទាប់មកក្រុមទាំងពីរ បានសម្រុកគ្នាទៅវិញទៅមក រហូតដល់ចុងម៉ោង ទើបកីឡាករ មិន រតនៈ រកបានគ្រាប់នាំមុខជាថ្មី ឲ្យក្រុមព្រះខ័នរាជស្វាយរៀង នៅនាទី៩០ ហើយក៏ជាគ្រាប់បាល់ជ័យជម្នះផងដែរ ។

គួរដឹងថា នេះជាលើកដំបូង ដែលព្រះខ័នរាជស្វាយរៀង បានលេងពានបើករដូវកាលថ្មីនេះ ហើយបានគ្រងជើងឯកតែម្ដង បន្ទាប់ពីភ្នំពេញក្រោន បានឈ្នះពាន Cambodian Super Cup ២រដូវកាលជាប់គ្នា ដោយយកឈ្នះក្រុមវិសាខា ២-១ ដូចគ្នា កាលពីឆ្នាំ២០២២ និងឆ្នាំ២០២៣ ៕