(ឡុងដ៍)៖ តោខៀវ Chlsea បាននឹងកំពុងធ្វើការលើកិច្ចព្រមព្រៀង ដើម្បីចុះហត្ថលេខាជាមួយខ្សែប្រយុទ្ធអេស្ប៉ាញ Samu Omorodion មកពីក្លិប Atletico Madrid។ នេះបើយោងតាមសារព័ត៌មាន BBC ចេញផ្សាយនៅថ្ងៃទី០៨ ខែសីហា ឆ្នាំ២០២៤។

ក្លិបអេស្ប៉ាញ Atletico Madrid បានយល់ព្រមលើកិច្ចព្រមព្រៀងតម្លៃ ៨១.៥លានផោន ដើម្បីចុះកិច្ចសន្យាជាមួយខ្សែប្រយុទ្ធ Julian Alvarez របស់ក្លិប Manchester City កាលពីថ្ងៃចន្ទ ហើយការលក់ Omorodion នឹងជួយបង្កើនថវិកា ក្នុងការទិញកីឡាករសញ្ជាតិអាហ្សង់ទីន Julian Alvarez។

វាត្រូវបានគេដឹងថា លក្ខខណ្ឌផ្ទាល់ខ្លួនឥឡូវនេះត្រូវបានព្រមព្រៀងជាមួយកីឡាករ Alvarez ហើយ ដែលនឹងចូលរួមក្នុងតម្លៃបឋម ៦៤.៤លានផោន ជាមួយនឹងប្រាក់លើកទឹកចិត្តបន្ថែម ១៧.១លានផោនទៀត។

Omorodion វ័យ ២០ឆ្នាំ បានចូលរួមជាមួយ Atletico កាលពីរដូវក្តៅមុន បន្ទាប់ពីបានបង្ហាញខ្លួនលើកដំបូងក្នុងលីគ La Liga ឱ្យក្លិប Granada ជាពេលវេលាដែលលោករកបានគ្រាប់បាល់ ក្នុងការប្រកួតទល់នឹងក្លិប Real Madrid។

Atletico ភ្លាមៗបានបញ្ជូនកីឡាករ Omorodion ទៅកាន់ក្លិប Alaves ក្នុងលក្ខខណ្ឌខ្ចីជើង ជាទីកន្លែងដែលលោករកបាន ៨គ្រាប់ ក្នុងការបង្ហាញខ្លួន ៣៥លើក កាលពីរដូវកាលមុន។

បច្ចុប្បន្នលោកកំពុងលេងនៅឯព្រឹត្តិការណ៍ Olympics ហើយលោករកបាន ១គ្រាប់ ក្នុងដំណើរការរបស់អេស្ប៉ាញទៅកាន់វគ្គផ្តាច់ព្រ័ត្រ៕