(អឺរ៉ុប)៖ អតីតអ្នកចាំទីក្លិបបិសាចក្រហម Manchester United កីឡាករ David de Gea កំពុងមានការពិភាក្សាជាមួយក្លិបលីគអ៉ីតាលី Fiorentina អំពីការឈានជើងចូលទីលានប្រកួតវិញ, នេះបើតាមប្រភពពី BBC បានឱ្យដឹងនាថ្ងៃទី០៩ ខែសីហា ឆ្នាំ២០២៤ ។

អ្នកចាំទីសញ្ជាតិអេស្ប៉ាញ មានវ័យ ៣៣ឆ្នាំ De Gea បានចំណាយពេលពេញមួយរដូវកាលមុន នៅក្រៅពីការប្រកួតប្រជែង ក្រោយពេលផុតកិច្ចសន្យាជាមួយក្លិប Manchester United ដែលជាកីឡាករចាំទីម្នាក់បាមចំណាយពេល ១២រដូវកាលនៅកីឡដ្ឋាន Old Trafford ។

De Gea បានបង្ហោះពាក្យ (ត្រៀមរួចរាល់) នៅលើបណ្តាញសង្គម ក្រោយពេលព្យាយាមហ្វឹកហាត់អំឡុងពេលសម្រាកពីក្លិបអាជីព នាមជាកីឡាករធ្លាប់លេងបាន ៥៤៥ប្រកួតកាលនៅជាមួយក្លិប Man United ដែលបានរួមចំណែកលើកពាន Premier League 2012-13 ។

Fiorentina ជាក្លិបបានរងជើងឯកពានលំដាប់លីគទី៣ អឺរ៉ុប UEFA European Conference League ចំនួន ២រដូវកាលចុងក្រោយនេះ ខណៈជម្រើសអ្នកចាំទីដៃទី១ ជាកីឡាករអ៉ីតាលី Pietro Terracciano ដែលលេងបាន ៤៧ប្រកួតនារដូវកាលមុន ៕