(ភ្នំពេញ)៖ បវរកញ្ញា Face Of Cambodia 2023 យស តារាវត្តី បានឆ្លៀតពេលដ៏មមាញឹករបស់ខ្លួន ចូលរួមក្នុងកិច្ចការងារមនុស្សធម៌ ដោយបានចំណាយទាំងកម្លាំងកាយចិត្ត និងថវិកាផ្ទាល់ខ្លួន ដើម្បីចែករំលែកក្ដីស្រលាញ់ដល់កុមាកំព្រា ដែលកំពុងខ្វះខាត។ ទោះជារវល់មុខជំនួញ និងការងារសិល្បៈយ៉ាងណាក្ដី ប៉ុន្ដែគេសង្កេតឃើញនាង នៅតែបន្ដធ្វើសកម្មភាពការងារសប្បុរសធម៌ ជាមួយប្អូនៗកុមារកំព្រា ដូចមុនដដែល។

​បវរកញ្ញារូបស្រស់រូបនេះថ្លែងថា «ខ្ញុំអរគុណដល់ជំនួយការរបស់ខ្ញុំ (Chorng) ដែលបានធ្វើការងារបានយ៉ាងល្អកន្លងមក។ ទោះជារវល់មុខជំនួញ និងការសិល្បៈក្ដី ប៉ុន្ដែខ្ញុំនៅតែបន្ដធ្វើការងារសប្បុរសធម៌ជាមួយៗប្អូនៗកុមារកំព្រាដូចមុនដដែល ហើយនៅថ្ងៃទី២៨ ខែសីហា នេះយើងនឹងចែករំលែកក្ដីស្រលាញ់ជាមួយប្អូនៗបន្ដទៀត»។
នេះមិនមែនជាលើកទី១នោះទេ ដែលយស តារាវត្តី បានធ្វើកិច្ចការសប្បុរសធម៌ តែជាញឹកញាប់ណាស់មកហើយ គ្រាន់តែពេលខ្លះនាងមិនបានបង្ហាញលើបណ្ដាញសង្គមប៉ុណ្ណោះ។ បវរកញ្ញា រូបស្រស់រូបនេះមាននិយមន័យផ្ទាល់ខ្លួនថា «Sharing is Caring» = (1 ៖Share Time ,2៖Share Money and 3៖ Share love and Attentiveness)។

ទាក់ទងនឹងរឿងថា តើនាងមានគម្រោងវិលមកប្រកួតបវរកញ្ញា នៅក្នុងកម្មវិធីផ្សេងៗទៀតវិញឬអត់? កញ្ញា យស តារាវត្តី បានបញ្ជាក់ថា នាងមិនទាន់កំណត់គោលដៅនោះទេ ប៉ុន្ដែនាងបានចូលរួមតាមវេទិការកញ្ញាឯកជាបន្ដបន្ទាប់។ តារាវត្តី ក៏បង្ហើបដែរថា នៅឆ្នាំក្រោយនេះនាងនឹងទិញសិទ្ធិ (License) Pageant ដែលនឹងរៀបចំដោយខ្លួនឯងតែម្ដង។

អ្នកនៅក្នុងវិស័យបរវកញ្ញា និងតារារួមអាជីពសរសើរពី យស តារាវត្តី ថាបវរកញ្ញាអាយុ២៤ឆ្នាំ ទម្ងន់៤៨ គីឡូក្រាម និងកម្ពស់១ម៉ែត្រ ៦៥សង់ទីម៉ែត្ររូបនេះ ពិតជាមានគោលដៅធំមិនធម្មតាឡើយ ព្រោះក្នុងពេលតែ១នាងជោគជ័យទាំងស្នេហា និងកាន់មុខជំនួញដល់ទៅ ៥ផ្សេងគ្នាដំណើរការដោយរលូន។ អ្វីដែលមិនអាចមើលរំលងបាននោះ គឺនាងបន្ដធ្វើកិច្ចការសប្បុរសធម៌ ដោយចំណាយពេលវេលា លុយកាក់ និងក្ដីស្រលាញ់ជាមួយកុមារកំព្រា ជាបន្ដបន្ទាប់។

ជាមួយគ្នានេះ យស តារាវត្តី បានសម្រេចចិត្តបង្ហាញមុខគូស្នេហ៍នៅខែសីហា ឆ្នាំ២០២៤ នេះហើយ ដោយនាងបានប្រាប់ឲ្យដឹងថា នឹងមានគម្រោងដឹកដៃគ្នារៀបការនៅ៥ឆ្នាំ ខាងមុខនេះហើយ ពោលគឺនៅឆ្នាំ២០២៩។ រូបភាពជាច្រើនបង្ហាញពីស្នេហារបស់ពួកគេ មានការយល់ចិត្តគ្នាច្បាស់លាស់ ទើបនាងហ៊ានកំណត់ពីពេលវេលារៀបការទុកជាមុន ដោយគ្មានការបារម្ភពីការប្រែប្រួលពីចំណងស្នេហាមួយនេះ។ តាមសកម្មភាពរបស់ វត្តី និងគូស្នេហ៍នោះបញ្ជាក់ថា ពួកគេបានស្វែងយល់ចិត្តគ្នាជាច្រើនឆ្នាំមកហើយ មិនមែនទើបតែពេលថ្មីៗនេះទេ។

តារាសម្ដែង និងបេក្ខភាព Face Of Cambodia 2023 យស តារាវត្តី បាននិយាយថា «នៅទីបំផុតខ្ញុំបានរកឃើញបុរសពិសេសរបស់ខ្ញុំហើយ។ ពួកយើងនឹងដឹកដៃគ្នារៀបការនៅ៥ឆ្នាំ ខាងមុខនេះទៀត ពោលគឺនៅឆ្នាំ២០២៩»។ បើទោះជាហ៊ានបញ្ចេញមុខអនាគតស្វាមីមែន ប៉ុន្ដែ យស តារាវត្តី នៅមិនទាន់ប្រាប់ពីកំណើតស្នេហ៍ និងប្រវត្តិការងារបុរសពិសេសរបស់នាងនោះទេ ប៉ុន្ដែការបង្ហាញមុខគូស្នេហ៍នាពេលនេះរបស់វត្តី ចំពេលដែលនាងកំពុងក្តាប់មុខជំនួញធំដល់ទៅ៥ព្រមគ្នាតែម្ដង ដែលធ្វើឲ្យនាងមមាញឹកទាំងរកស៊ី និងឆ្លៀតរឹតចំណងស្នេហា ជាមួយបណ្ដូលចិត្តព្រមគ្នាតែម្ដង។ អាជីវកម្មក្រៅសិល្បៈដែលតារាវត្តី កំពុងតែតំណើរការនោះមានដូចជាទី១ Man Of Food, ទី២ By Daravathey, ទី៣ TEmm by Daravathey, ទី៤ Sexy MaMa By DAravathey និងទី៥ ទឹកត្រចៀកកាំព្រិល By Daravathey៕