(ហ្សឺណែវ)៖ ប្រមុខអង្គការសុខភាពពិភពលោក (WHO) លោក ថេដ្រូស អាដាណម ហ្គេប្រេយែសឹស (Tedros Adhanom Ghebreyesus) បាននិយាយថាករណីឆ្លងរាតត្បាត COVID-19 រហូតដល់ ១៥០,០០០ករណីថ្មី ត្រូវបានរាយការណ៍ក្នុងរយៈពេល ២៤ម៉ោងចុងក្រោយនេះ ហើយក្នុងចំណោមករណីឆ្លងទាំងនេះ​មានជាងពាក់កណ្ដាលនៅក្នុងទ្វីបអាមេរិក ដែលកំពុងប្រឈមមុខ នឹងស្ថានភាពឆ្លងកាន់តែអាក្រក់ឡើង។ នេះបើតាមការចេញផ្សាយ​ដោយសារព័ត៌មាន CNA នៅរសៀលថ្ងៃសៅរ៍ ទី២០ ខែមិថុនា ឆ្នាំ២០២០។

នៅក្នុងសន្និសីទសារព័ត៌មានមួយ នៅថ្ងៃសុក្រសប្ដាហ៍នេះ លោក Tedros បានគូសបញ្ជាក់ដូច្នេះថា «ពិភពលោកកំពុងស្ថិតនៅក្នុងតំណាក់ដ៏គ្រោះថ្នាក់ថ្មីមួយ... ដោយវីរុសនេះ (COVID-19) នៅតែបន្តឆ្លងរាតត្បាតយ៉ាងឆាប់រហ័ស ហើយនៅតែមានគ្រោះថ្នាក់បំផុតដល់អាយុជីវិតមនុស្ស ខណៈមនុស្សងាយរងគ្រោះ​នៅតែមានចំនួនច្រើនដដែល»។ ប្រមុខអង្គការសុខភាពពិភពលោករូបនេះ បានបន្ថែមទៀតថាបច្ចុប្បន្នទ្វីបអាមេរិក ជាពិសេសគឺប្រទេសប្រេស៊ីល, តំបន់អាស៊ីខាងត្បូង និងមជ្ឈិមបូព៌ា គឺជាតំបន់ដែល COVID-19 លុកលុយខ្លាំង។

គួរបញ្ជាក់ថា បើតាមគេហទំព័រ worldometers ម៉ោង ៣៖០០នាទីរសៀលថ្ងៃសៅរ៍ ទី២០ ខែមិថុនា ឆ្នាំ២០២០នេះ អ្នកឆ្លង COVID-19 នៅទាំងពិភពលោកមានចំនួន ៨.៧លាននាក់ក្នុងនោះស្លាប់ ៤៦២,៨៧៦នាក់ និងជាសះស្បើយឡើងវិញ ៤.៦លាននាក់៕