(ដាម៉ាស់)៖ ឧទ្ធម្ភាគចក្រយោធាអ៉ីស្រាអែលមួយចំនួន បានបើកការវាយប្រហារ ទៅលើមូលដ្ឋានទ័ពស៊ីរី ស្ថិតនៅក្នុងខេត្តគូនៃត្រា (Quneitra) ភាគខាងត្បូងប្រទេសកាលពីយប់ថ្ងៃសុក្រ និងបានបង្កឲ្យទាហានស៊ីរី ០២នាក់រងរបួស។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នាព្រឹកថ្ងៃសៅរ៍ ទី២៥ ខែកក្កដា ឆ្នាំ២០២០។

បើតាមសារព័ត៌មានរដ្ឋស៊ីរី SANA ឧទ្ធម្ភាគចក្រយោធាអ៉ីស្រាអែល បានធ្វើការបាញ់រះទៅលើទីតាំងយោធាមួយចំនួន នៅក្នុងខេត្ត Quneitra របស់ប្រទេសស៊ីរី ដែលស្ថិតនៅក្បែរតំបន់ខ្ពង់រាប ហ្គោឡេន ហេក (Golan Heights) ដែលអ៉ីស្រាអែលកំពុងគ្រប់គ្រង។

គួរបញ្ជាក់ថា ប្រព័ន្ធការពារដែនអាកាសស៊ីរី ក៏ត្រូវបានដាក់ពង្រាយ នៅក្នុងខេត្ត Quneitra ខាងលើនេះដែរ ប៉ុន្តែគ្មានព័ត៌មានណាបានបញ្ជាក់ អំពីគោលដៅនេះឡើយ។ កន្លងមកអ៉ីស្រាអែលតែងតែធ្វើការវាយប្រហារ ទៅលើមូលដ្ឋានយោធានានា នៅក្នុងទឹកដីស៊ីរី ដែលអ៉ីស្រាអែលបានអះអាងថា ជាកន្លែងលាក់ខ្លួននៃកងជីវពលអ៉ីរ៉ង់ នៅក្នុងសង្គ្រាមដែលបានអូសបន្លាយជាង ៩ឆ្នាំមកហើយនេះ៕