(បាងកក)៖ នាយករដ្ឋមន្ត្រីថៃលោក បា្រយុទ្ធ ចាន់អូចា បានប្រកាសថា លោកត្រៀមខ្លួនជាស្រេចដើម្បីលុបចោលបទបញ្ជាដាក់ប្រទេសក្នុងគ្រាមានអាសន្ន ខណៈក្រុមបាតុករបានតបតវិញ ដោយប្រកាសទុកពេលឱ្យអតីតមេដឹកនាំយោធារូបនេះ ០៣ថ្ងៃដើម្បីរៀបចំចុះចេញពីតំណែង បើមិនដូច្នោះទេលោកនឹងត្រូវប្រឈមមុខ នឹងមហាបាតុកម្មកាន់តែធំ។ នេះបើតាមការចេញផ្សាយ ដោយសារព័ត៌មាន CNA នៅព្រឹកថ្ងៃព្រហស្បតិ៍ ទី២២ ខែតុលា ឆ្នាំ២០២០។

នៅក្នុងសុន្ទរកថាតាមកញ្ចក់ទូរទស្សន៍ លោក បា្រយុទ្ធ ក៏បានជំរុញផងដែរឱ្យក្រុមបាតុករ ទុកពេលដល់សភាជាតិ ដែលសម្បូរទៅដោយអ្នកគាំទ្ររូបលោកនោះ
ដើរតួនាទីដោះស្រាយជម្លោះនាពេលបច្ចុប្បន្ន ហើយថានឹងលុបចោលបទបញ្ជាដាក់ប្រទេសក្នុងគ្រាអាសន្ន ប្រសិនបើគ្មានអំពើហិង្សាកើតឡើង។ លោក ប្រាយុទ្ធ បានលើកឡើងដូច្នេះថា «ខ្ញុំត្រៀមខ្លួនជាស្រេចដើម្បីលុបចោល បទបញ្ជាដាក់ប្រទេសក្នុងគ្រាអាសន្ន... ហើយខ្ញុំនឹងធ្វើវាភ្លាម ប្រសិនបើគ្មានអំពើហិង្សាកើតឡើង»។

ក្រោយការលើកឡើងបែបនេះរបស់លោក ប្រាយុទ្ធ មេដឹកនាំបាតុករពីររូបបានប្រកាសទុកពេល ០៣ថ្ងៃ ឱ្យលោកនាយករដ្ឋមន្ត្រីចុះចេញពីតំណែង។ «ការតស៊ូរបស់ពួកយើងនឹងមិនបញ្ចប់ទេ ដរាបណាគាត់ (លោក ប្រាយុទ្ធ) មិនព្រមចុះចេញពីតំណែង។ ប្រសិនបើក្នុងរយៈពេល ០៣ថ្ងៃ គាត់នៅតែមិនព្រមចុះចេញពីតំណែង នោះនឹងត្រូវប្រឈមមុខនឹងប្រជាជនសាជាថ្មី»។ នេះគឺជាសម្ដីរបស់មេដឹកនាំបាតុករម្នាក់គឺលោកស្រី ផាត់សារ៉ាវ៉ាលី (Patsaravalee) ប្រាប់អ្នកគាំទ្រនៅថ្ងៃពុធនេះ។ ក៏ប៉ុន្តែរយៈពេល ២ម៉ោងក្រោយមកលោកស្រី និងមេដឹកនាំបាតុករម្នាក់ទៀត ត្រូវបានចាប់ខ្លួនដោយប៉ូលិសបានចោទប្រកាន់ថា ពួកគេទាំងពីរនាក់បំពានបទបញ្ជា ដាក់ប្រទេសក្នុងគ្រាមានអាសន្ន។

គួរជម្រាបថា លោក ប្រាយទ្ធ ចាន់អូចា បានដាក់ចេញបទបញ្ជាដាក់ប្រទេសក្នុងគ្រាអាសន្ន កាលពីសប្ដាហ៍មុន ដោយហាមឃាត់ការជួបជុំគ្នាចាប់ពីមនុស្ស ០៥នាក់ឡើងទៅ ដើម្បីបិទបញ្ចប់បាតុកម្មតវ៉ាអស់រយៈពេលជាង ៣ខែមកនេះ។ ប៉ុន្តែក្រុមបាតុករ ដែលភាគច្រើនជាយុវជន នៅតែបន្តធ្វើបាតុកម្មទាមទារឱ្យលោក ប្រាយុទ្ធ ចុះចេញពីតំណែងដដែល ព្រមទាំងស្នើឱ្យមានការធ្វើវិសោធនកម្មរដ្ឋធម្មសព្វថ្ងៃ សំដៅកាត់បន្ថយអំណាចរបស់ព្រះមហាក្សត្រថៃ ដោយពួកគេយល់ឃើញថា ទ្រង់មានអំណាចជ្រុលហួសហេតុពេក៕