(ឡុងដ៍)៖ នាយករដ្ឋមន្រ្តីចក្រភពអង់គ្លេស លោក Keir Starmer នឹងជួបជាមួយប្រធានាធិបតីសហរដ្ឋអាមេរិក លោក ចូ បៃដិន ដើម្បីបើកកិច្ចពិភាក្សាគ្នានាថ្ងៃសុក្រសប្តាហ៍នេះ (ពេលវេលានៅទីក្រុងវ៉ាស៉ីនតោន) ស្តីពីជំហានបន្ទាប់ ក្នុងការគាំទ្រអ៊ុយក្រែន ដែលនឹងផ្តោតជា​ចម្បងទៅលើ ការសម្រេចចិត្តថា តើនឹងត្រូវអនុញ្ញាតឱ្យអ៊ុយក្រែនអាចប្រើប្រាស់ មីស៉ីលរបស់លោកខាងលិច វាយប្រហារចូលជ្រៅទៅ​ក្នុងទឹកដីរបស់ប្រទេសរុស្ស៉ី ដែរឬយ៉ាងណា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី១៣ ខែកញ្ញា ឆ្នាំ២០២៤។

ជាច្រើនខែមកនេះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិងកំពុងស្នើសុំយ៉ាងទទូចឱ្យសម្ព័ន្ធមិត្តលោកខាងលិច អនុញ្ញាតឱ្យប្រទេសរបស់លោក ប្រើប្រាស់មីស៉ីលរយៈចម្ងាយឆ្ងាយ ដូចជា ATACMS របស់អាមេរិក និង Storm Shardow របស់អង់គ្លេស ជាដើម បាញ់ចូលជ្រៅទៅក្នុងទឹកដីរបស់រុស្ស៉ី ដើម្បីដាក់កំហិតសមត្ថភាព របស់ទីក្រុងមូស្គូ ក្នុងការបើកការវាយប្រហារលើអ៊ុយក្រែន។

បើតាមកាសែតអាមេរិក New York Times រាយការណ៍ ដោយផ្អែកលើប្រភពពីក្រុមមន្រ្តីអឺរ៉ុប អាមេរិកកំពុងពិចារណាអនុញ្ញាត​ឱ្យ អ៊ុយក្រែនអាចប្រើប្រាស់មីស៉ីលរយៈចម្ងាយឆ្ងាយ ប្រឆាំងគោលដៅជ្រៅៗនៅក្នុងទឹកដីរុស្ស៉ីបាន ប៉ុន្តែក្នុងលក្ខខណ្ខថា អាវុធនោះ មិនមែនជាមីស៉ីលដែលអាមេរិកផ្គត់ផ្គង់ឱ្យឡើយ។ កាលពីថ្ងៃព្រហស្បតិ៍សប្តាហ៍នេះ ប្រធានាធិបតីរុស្ស៉ី លោក វ៉្លាឌីមៀ ពូទីន បានចេញមុខព្រមានថា លោកខាងលិចនឹងត្រូវធ្វើសង្រ្គាមដោយផ្ទាល់ជាមួយរុស្ស៉ី ប្រសិនបើអនុញ្ញាតឱ្យអ៊ុយក្រែន វាយប្រហារលើ​ទឹកដីរុស្ស៉ី ដោយប្រើមីស៉ីលរយៈចម្ងាយឆ្ងាយ ផលិតដោយក្រុមប្រទេសលោកខាងលិច។

គួរបញ្ជាក់ថា កិច្ចពិភាក្សានៅទីក្រុងវ៉ាស៉ីនតោន រវាងមេដឹកនាំអាមេរិកនិងចក្រភពអង់គ្លេស កើតមានឡើង បន្ទាប់ពីការបំពេញ​ទស្សនកិច្ចរួមគ្នា ទៅកាន់ទីក្រុងកៀវ ដោយរដ្ឋមន្រ្តីការបរទេសអាមេរិក លោក Antony Blinken និងសមភាគីអង់គ្លេស លោក David Lammy ក្នុងសប្តាហ៍នេះ។ អំឡុងទស្សនកិច្ចនោះ ប្រមុខការបរទេសទាំងពីរ បានសន្យាបន្តផ្តល់ការគាំទ្រសម្រាប់​អ៊ុយក្រែន ប៉ុន្តែមិនមានការប្តេជ្ញាណាមួយ ស្តីពីការប្រើប្រាស់មីស៉ីលរយៈចម្ងាយឆ្ងាយឡើយ៕