(ហែលស៉ីនគី)៖ ប្រធានាធិបតីហ្វាំងឡង់ លោក Alexander Stubb បានអំពាវនាវឱ្យមានការពង្រីកចំនួនសមាជិកអចិន្រ្តៃយ៍ នៃក្រុមប្រឹក្សាសន្តិសុខរបស់អង្គការសហប្រជាជាតិ (UN), លុបចោលការប្រើអំណាចវេតូពីសំណាក់ប្រទេសតែមួយ និងបណ្តេញសមាជិកទាំងឡាយណា ដែលធ្វើសង្រ្គាមខុសច្បាប់ ដូចជាការឈ្លានពានរបស់រុស្ស៉ី នៅអ៊ុយក្រែន ជាដើម។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី១៨ ខែកញ្ញា ឆ្នាំ២០២៤។

លោក Stubb បាននិយាយថា រូបលោកនឹងបង្ហាញការយល់ឃើញដូចខាងលើ អំឡុងមហាសន្និបាត UN នាសប្តាហ៍ក្រោយ ដែលនឹងរួមមាន ការជជែកស្តីអំពីក្រុមប្រឹក្សាសន្តិសុខ ដែលជាស្ថាប័នសម្រេចចិត្តកំពូលបំផុត របស់អង្គការសហប្រជាជាតិ។ ដោយមាន សមាជិកអចិន្រ្តៃយ៍ចំនួន៥ និងសមាជិកឆ្លាស់វេនចំនួន១០ ក្រុមប្រឹក្សាសន្តិសុខ UN មានតួនាទី រក្សាសន្តិភាពពិភពលោក ប៉ុន្តែការប្រកួតប្រជែងភូមិសាស្រ្តនយោបាយ បានធ្វើឱ្យស្ថាប័ននេះជាប់គាំង ជុំវិញបញ្ហាក្តៅៗ រាប់ចាប់តាំងពីសង្រ្គាមអ៊ុយក្រែន រហូតដល់សង្រ្គាមនៅតំបន់ហ្កាហ្សា។

ថ្លែងក្នុងកិច្ចសម្ភាសមួយ កាលពីថ្ងៃអង្គារសប្តាហ៍នេះ លោក Stubb បានលើកឡើងថា រូបលោកនឹងស្នើឱ្យបង្កើនចំនួន​សមាជិកអចិន្រ្តៃយ៍ ក្នុងក្រុមប្រឹក្សាសន្តិសុខ UN ឱ្យដល់១០ប្រទេស គឺ១ប្រទេសពីតំបន់អាមេរិកឡាទីន ២ពីតំបន់អាហ្រ្វិក និង២ទៀតពីតំបន់អាស៉ី។

ទន្ទឹមគ្នានោះ លោកបានបន្ថែមថា មិនគួរមានការប្រើអំណាចវេតូ ពីសំណាក់ប្រទេសមួយតែឯង តទៀតឡើយ។ អាមេរិក រុស្ស៉ី ចិន បារាំង និងចក្រភពអង់គ្លេស ជាសមាជិកអចិន្រ្តៃយ៍ទាំង៥ នៅក្រុមប្រឹក្សាសន្តិសុខ ដែលមានអំណាចវេតូ។ ក្នុងករណី ប្រសិនបើមានប្រទេសណាមួយ ក្នុងចំណោមប្រទេសទាំង៥ សម្រេចចិត្តប្រើអំណាចវេតូរបស់ខ្លួន នោះសេចក្តីសម្រេចនានា មិនអាចត្រូវអនុម័តបានឡើយ នៅក្រុមប្រឹក្សាសន្តិសុខ។

លោក Stubb បានបន្តទៀតថា សមាជិកទាំងឡាយណា ដែលធ្វើសង្រ្គាមខុសច្បាប់ ដូចអ្វីដែលរុស្ស៉ីកំពុងតែធ្វើនៅអ៊ុយក្រែន នាពេលនេះជាដើម គួរតែត្រូវបណ្តេញចេញពី ក្រុមប្រឹក្សាសន្តិសុខផងដែរ។ លោកប្រធានាធិបតីហ្វាំងឡង់ បានគូសបញ្ជាក់ថា សំណើ​ធ្វើកំណែទម្រង់ក្រុមប្រឹក្សាសន្តិសុខរបស់លោក គឺលើសពីអ្វីដែលរដ្ឋសមាជិកតូចៗ តែងតែធ្លាប់និយាយ ប៉ុន្តែលោកសង្កត់ធ្ងន់ថា វាជារឿងចាំបាច់ ព្រោះប្រទេសធំៗ នឹងគ្មានថ្ងៃស្នើឡើងនូវអ្វី ដែលនឹងធ្វើឱ្យឥទ្ធិពលពួកគេថយចុះឡើយ។

គួរបញ្ជាក់ថា ការផ្លាស់ប្តូរណាមួយ នៅក្នុងសមាជិកភាពនៃក្រុមប្រឹក្សាសន្តិសុខ ត្រូវការការអនុម័តយល់ព្រម និងផ្តល់សច្ចាប័នពី​សំណាក់ សមាជិក២ភាគ៣ នៃមហាសន្និបាត UN ហើយសមាជិកអចិន្រ្តៃយ៍ទាំងអស់ នៃក្រុមប្រឹក្សាសន្តិសុខផ្ទាល់ ក៏ចាំបាច់ត្រូវតែយល់ព្រម ផងដែរ៕