(ម៉ានីល)៖​ ហ្វីលីពីន​ បាននិងកំពុងជម្លៀសមនុស្សរាប់ម៉ឺននាក់ចេញពីផ្ទះរបស់ពួកគេ ហេីយលុបចោលជើងហោះហើរជាច្រេីន​នៅថ្ងៃសៅរ៍ ទី១៦​ ខែវិច្ឆកានេះ​ ខណៈព្យុះទីហ្វុងមួយកំពុងរំកិលចុះមក​ ដោយអាចបង្កជាភ្លៀងធ្លាក់​ខ្លាំង ខ្យល់ព្យុះ​ និងទឹកជំនន់។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន​ Reuters។

ដោយមានកម្លាំងខ្យល់ ១៨៥គីឡូម៉ែត្រក្នុងមួយម៉ោង​ ព្យុះ Man-Yi កំពុងធ្វើដំណើរទៅកាន់ផ្នែកខាងកើតនៃកោះ Luzon។​ ទីភ្នាក់ងារឧតុនិយម​ បានណែនាំឱ្យបង្កើនការប្រុងប្រយ័ត្នខ្ពស់បំផុតសម្រាប់ខេត្ត Catanduanes និង Camarines Sur។ ព្យុះនេះទំនងជានឹងបោកបក់នៅជិតខេត្ត Catanduanes នៅយប់ថ្ងៃសៅរ៍ឬព្រឹកថ្ងៃអាទិត្យ។​ មានការព្រមានអំពីការវិវត្តន៍ទៅជាព្យុះកាន់តែគ្រោះថ្នាក់​ នៅតំបន់ឆ្នេរនៃកោះ​ Luzon។​ ទោះជាព្យុះ​អាចចុះខ្សោយឥទ្ធិពល​ខ្លះពេលរសាត់ចេញកោះ​ ប៉ុន្តែវាប្រហែលនឹងនៅតែជាព្យុះទីហ្វុង​រហូតបោកបក់ទៅដល់សមុទ្រចិនខាងត្បូង។

ទីភ្នាក់ងារគ្រោះមហន្តរាយ​ បានឱ្យដឹងថា មនុស្សជិត ១៨០,០០០នាក់នៅក្នុងតំបន់ភាគកណ្តាល​ នៃទីក្រុង Bicol ត្រូវបានជម្លៀសចេញ។ Man-Yi ក៏បានបង្ខំឱ្យលុបចោលជើងហោះហើរជាច្រេីននៅក្នុងតំបន់ Visayas ភាគខាងកើត ដែលប្រឈមមុខនឹងមហាសមុទ្រប៉ាស៉ីហ្វិក។

គួរបញ្ជាក់ថា​ ជាមធ្យមព្យុះត្រូពិចប្រហែល ២០តែងតែវាយប្រហារប្រទេសហ្វីលីពីនជារៀងរាល់ឆ្នាំ ដោយនាំមកនូវភ្លៀង​ ខ្យល់បោកបក់​ និងការរអិលបាក់ដី។​ កាលពីខែតុលា ទឹកជំនន់ និងការរអិលបាក់ដី​ ដោយសារព្យុះត្រូពិច Trami និងព្យុះទីហ្វុង Kong-rey បានសម្លាប់មនុស្ស ១៦២នាក់ និង​២២នាក់បាត់ខ្លួន៕