(ឡាអេ)៖ នៅថ្ងៃចន្ទ ទី២ ខែធ្នូ ឆ្នាំ ២០២៤នេះ តុលាការកំពូលនៃអង្គការសហប្រជាជាតិ (UN) បានចាប់ផ្តើមបើកសវនាការលើកាតព្វកិច្ចផ្លូវច្បាប់របស់ប្រទេសនានា ក្នុងការប្រយុទ្ធប្រឆាំងបញ្ហាប្រែប្រួលអាកាសធាតុ និងផលវិបាកសម្រាប់ប្រទេសទាំងនោះ ដែលរួមចំណែកដល់ការឡើងកំដៅផែនដី ហើយនាំឱ្យមានវិវាទទូទាំងពិភពលោក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។
វ៉ានូអាទូ ដែលស្ថិតក្នុងចំណោមប្រទេសដីកោះតូចៗ ដែលបានដឹកនាំកិច្ចប្រឹងប្រែង ជំរុញឱ្យតុលាការយុត្តិធម៌អន្តរជាតិ (ICJ) ផ្តល់មតិណែនាំនោះ នឹងក្លាយជារដ្ឋដំបូងគេដែលត្រូវផ្តល់ទស្សនៈ ក្នុងចំណោមរដ្ឋ និងអង្គការអន្តរជាតិជាង ១០០ផ្សេងទៀត នៅក្នុងសវនាការរបស់ ICJ ដែលមានរយៈពេល២សប្តាហ៍។
ខណៈមតិណែនាំរបស់តុលាការ មិនដាក់កំហិតឱ្យអនុវត្តតាមក៏ដោយ វាមានសារៈសំខាន់ផ្នែកច្បាប់ និងនយោបាយ។អ្នកជំនាញនិយាយថា មតិណែនាំរបស់តុលាការ ICJ ទំនងជាត្រូវយកធ្វើហេតុផល នៃបណ្តឹងផ្នែកអាកាសធាតុនានា នៅក្នុងតុលាការរាប់ចាប់ពីអឺរ៉ុប ទៅដល់អាមេរិកឡាទីន ឬអាចលើសពីនេះ។
ក្រៅពីរដ្ឋកោះតូចៗ ប្រទេសលោកខាងលិច និងប្រទេសកំពុងអភិវឌ្ឍជាច្រើន តុលាការ ICJ នឹងស្តាប់ទស្សនៈពីប្រទេសបញ្ចេញឧស្ម័នផ្ទះកញ្ចក់កំពូលចំនួន ២របស់ពិភពលោក គឺសហរដ្ឋអាមេរិក និងចិន។ រីឯក្រុមប្រទេសផលិតប្រេង OPEC ក៏នឹងផ្តល់ទស្សនៈរបស់ខ្លួនផងដែរ។ សវនាការនេះ នឹងបន្តរហូតដល់ថ្ងៃទី ៣១ ខែធ្នូ ហើយមតិណែនាំរបស់តុលាការ រំពឹងថានឹងសម្រេចបាន នៅឆ្នាំ ២០២៥៕
