(បេរូត)៖ អ៉ីស្រាអែល បានគំរាមថានឹងវិលទៅធ្វើសង្រ្គាមនៅលីបង់វិញ ប្រសិនបើបទឈប់បាញ់ជាមួយក្រុមហេសបូឡា ដួលរលំទាំងស្រុង ហើយការវាយលុកនៅលើកនេះ នឹងចូលកាន់តែជ្រៅ ហើយកំណត់គោលដៅលើរដ្ឋលីបង់តែម្តង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៤ ខែធ្នូ ឆ្នាំ ២០២៤។
បទឈប់បាញ់អ៉ីស្រាអែល-ហេសបូឡា ដែលចូលជាធរមានកាលពីសប្តាហ៍មុន ត្រូវបានបំពាន ដោយភាគីទាំងសងខាង បានចោទប្រកាន់គ្នាទៅវិញទៅមក។ នៅពេលចុះទៅកាន់តំបន់ព្រំដែនភាគខាងជើង រដ្ឋមន្រ្តីការពារជាតិអ៉ីស្រាអែល លោក Israel Katz គូសបញ្ជាក់ថា «បើយើងវិលទៅធ្វើសង្រ្គាមវិញ យើងនឹងធ្វើឱ្យខ្លាំងជាងមុន ហើយអ្វីដែលសំខាន់បំផុត ដែលពួកគេត្រូវដឹង នោះគឺនឹងលែងមានការលើកលែង សម្រាប់រដ្ឋលីបង់ទៀតហើយ»។ លោកបន្ថែមថា «ប្រសិនបើសង្រ្គាមបន្តមកដល់ពេលនេះ យើងបានបំបែករដ្ឋលីបង់ ពីក្រុមហេសបូឡា បាត់ទៅហើយ»។
គួរបញ្ជាក់ថា គិតត្រឹមថ្ងៃអង្គារសប្តាហ៍នេះ មន្ត្រីជាន់ខ្ពស់លីបង់ បានជំរុញដល់ទីក្រុងវ៉ាស៉ីនតោន និងទីក្រុងប៉ារីស ឱ្យដាក់សម្ពាធលើអ៉ីស្រាអែល ឱ្យរក្សាបទឈប់បាញ់។ បើតាមអ្នកនាំពាក្យក្រសួងការបរទេសអាមេរិក លោក Matt Miller បទឈប់បាញ់កំពុងជាប់គាំង ហើយអាចមាននូវការបំពានពិតមែន។
ដោយឡែក អ្នកតំណាងរបស់បារាំង លោក Guillaume Ponchin គ្រោងទៅដល់ទីក្រុងបេរូត នៅថ្ងៃពុធនេះ ហើយគណៈកម្មាធិការនឹងបើកកិច្ចប្រជុំលើកដំបូង នៅថ្ងៃព្រហស្បតិ៍។ ប្រភពដែលដឹងពីបញ្ហានេះ បានប្រាប់ Reuters សំដៅលើការវាយប្រហារបណ្តើរៗរបស់អ៉ីស្រាអែលថា ទោះជាមានបទឈប់បាញ់ក៏ដោយ ប៉ុន្តែភាពបន្ទាន់ក្នុងការបញ្ចប់យន្តការត្រូវតែមាន បើមិនដូច្នេះទេវានឹងយឺតពេល៕
