(វ៉ាស៉ីនតោន)៖ ប្រធានាធិបតីអាមេរិក លោក ចូ បៃដិន បាននិយាយថា សហរដ្ឋអាមេរិកនឹងធ្វើការជាមួយដៃគូ ក៏ដូចជាអ្នកពាក់ព័ន្ធក្នុងប្រទេសស៉ីរី ដើម្បីជួយចាប់យកឱកាសណាមួយ ដែលលេចចេញដោយខ្លួនឯង បន្ទាប់ពីក្រុមឧទ្ទាមផ្តួលរំលំ រដ្ឋាភិបាលប្រធានាធិបតី Bashar al-Assad។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី៩ ខែធ្នូ ឆ្នាំ ២០២៤។
លោក បៃដិន ដែលចូលកាន់តំណែងកាលពីឆ្នាំ ២០២១ បញ្ជាក់ថា «អស់ជាច្រើនឆ្នាំមកនេះ អ្នកគាំទ្រសំខាន់ៗរបស់ លោក Assad មានអ៉ីរ៉ង់ ហេសបូឡា និងរុស្ស៉ី។ ប៉ុន្តែកាលពីសប្តាហ៍មុន ការគាំទ្ររបស់ពួកគេបានដួលរលំ។ កម្លាំងពួកគេទាំង ៣ ចុះខ្សោយជាងកាលពីពេល ដែលខ្ញុំចូលកាន់តំណែងទៅទៀត»។ លោក បៃដិន បន្ថែមថា «សហរដ្ឋអាមេរិក នឹងធ្វើការជាមួយដៃគូ និងអ្នកពាក់ព័ន្ធនៅក្នុងប្រទេសស៉ីរី ដើម្បីជួយពួកគេចាប់យកឱកាសមួយ គ្រប់គ្រងហានិភ័យ»។
ប៉ុន្តែមន្ត្រីជាន់ខ្ពស់អាមេរិកម្នាក់ បានព្រមានថា សហរដ្ឋអាមេរិក មិនមានគម្រោងផ្តល់ផែនការមេសម្រាប់ស៉ីរី ទៅថ្ងៃមុខឡើយ ខណៈកំពុងតាមមើលយ៉ាងដិតដល់ នូវសេចក្តីថ្លែងការណ៍ពីក្រុមឧទ្ទាម HTS។ មន្រ្តីដដែលរូបនេះនិយាយថា សហរដ្ឋអាមេរិក នឹងធ្វើការដើម្បីតែធានាសុវត្ថិភាពឃ្លាំងស្តុកអាវុធគីមី ហើយថាកងទ័ពអាមេរិកគ្មានតួនាទីនៅសមរភូមិទេ ក្នុងកិច្ចខិតខំប្រឹងប្រែងជួយរបស់ខ្លួន។
គួរបញ្ជាក់ថា អនាគតនៃមូលដ្ឋានទ័ពសំខាន់ពីររបស់រុស្ស៉ី និងមូលដ្ឋានតូចៗមួយចំនួននៅស៉ីរី ក៏ស្ថិតក្នុងភាពមិនច្បាស់លាស់នៅឡើយដែរ។ កន្លងមក មូលដ្ឋានទ័ពទាំងនោះត្រូវបានប្រើប្រាស់ សម្រាប់ការគាំទ្រ លោក Assad និងជាទីសម្រាប់រុស្ស៉ីឈរជើងក្នុងតំបន់៕
