(មូស្គូ)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍សប្តាហ៍នេះថា មិនមានពេលនៅសល់ទៀតទេក្នុងឆ្នាំនេះ សម្រាប់ការចុះកុងត្រាថ្មីលើកិច្ចព្រមព្រៀងដឹកជញ្ជូនឧស្ម័នជាមួយអ៊ុយក្រែន
ហើយថាអ៊ុយក្រែនខ្លួនឯង ជាអ្នកបដិសេធមិនបន្តកិច្ចព្រមព្រៀង ដែលនាំឧស្ម័នទៅកាន់ប្រទេសស្លូវ៉ាគី សាធារណរដ្ឋឆែក និងអូទ្រីសផងនោះ។ នេះបើយោងតាមចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៧ ខែធ្នូ ឆ្នាំ ២០២៤។
កិច្ចព្រមព្រៀងដឹកជញ្ជូនឧស្ម័នរយៈពេល ៥ឆ្នាំបច្ចុប្បន្ន រវាងរុស្ស៉ី និងអ៊ុយក្រែន ត្រូវផុតកំណត់ត្រឹមចុងឆ្នាំនេះ។ លោក ពូទីន និយាយថា ពួកគេប្រកាសមិនបន្តកិច្ចព្រមព្រៀងថ្មី ដោយបន្ថែមថា ទីក្រុងកៀវត្រូវបានជំរុញឱ្យធ្វើបែបនេះ ដោយអឺរ៉ុប។ លោក ពូទីន គូសបញ្ជាក់ថា «គ្មានកុងត្រាថ្មីទេ ហើយវាក៏មិនអាចសម្រេចបាន ក្នុងរយៈពេល៣ ទៅ៤ថ្ងៃឡើយ»។
បំពង់បង្ហូរឧស្ម័ន Urengoy-Pomary-Uzhgorod សម័យសហភាពសូវៀត នាំឧស្ម័នពីតំបន់ស៉ីបេរី កាត់តាមទីប្រជុំជន Sudzha ដែលឥឡូវនេះ ស្ថិតក្រោមការគ្រប់គ្រងរបស់យោធាអ៊ុយក្រែន នៅក្នុងតំបន់ Kursk របស់រុស្ស៉ី បន្ទាប់មកហូរកាត់អ៊ុយក្រែន ទៅស្លូវ៉ាគី។ នៅឯស្លូវ៉ាគី បំពង់បង្ហូរឧស្ម័ន បានបំបែកហូរនាំឧស្ម័នទៅកាន់សាធារណរដ្ឋឆែក និងអូទ្រីស។ តាមលោក ពូទីន រុស្ស៉ីត្រៀមខ្លួនរួចជាស្រេច ក្នុងការផ្គត់ផ្គង់ឧស្ម័នតាមរយៈអ៊ុយក្រែន ដល់អតិថិជនណាមួយ ប៉ុន្តែពាក្យបណ្តឹងបានរារាំងដល់ដំណើរការ។
គួរបញ្ជាក់ថា ការផ្គត់ផ្គង់ឧស្ម័នរុស្ស៉ីទៅអឺរ៉ុប តាមរយៈអ៊ុយក្រែន មានចំនួនតិចតួច គិតចាប់តាំងពីសង្រ្គាមផ្ទុះឡើង។ កាលពីឆ្នាំ ២០២៣ រុស្ស៉ី ដឹកជញ្ជូនឧស្ម័នប្រហែល ១៥ពាន់លានម៉ែត្រគូប ឆ្លងកាត់អ៊ុយក្រែន ពោលគឺមានតែ ៨ភាគរយប៉ុណ្ណោះ បើប្រៀបធៀបនឹងលំហូរឧស្ម័នដ៏ច្រើន ក្នុងឆ្នាំ ២០១៨-២០១៩៕
