(ហ៊្សេរុយសាឡិម)៖ នៅថ្ងៃសៅរ៍ ទី២៥ ខែមករានេះ ក្រុមហាម៉ាស បានដោះលែងទាហានស្រ្តីអ៉ីស្រាអែល ៤នាក់ដែលជាចំណាប់ខ្មាំង ជាថ្នូរនឹងអ្នកទោសប៉ាឡេស្ទីនប្រហែល ២០០នាក់ទៅតាមកិច្ចព្រមព្រៀងបទឈប់បាញ់ដែលមានបំណងបញ្ចប់សង្រ្គាមរយៈពេល ១៥ខែនៅតំបន់ហ្កាហ្សា។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។
ទាហាន ៤រូបនោះមានឈ្មោះ Karina Ariev, Daniella Gilboa, Naama Levy និង Liri Albag។ ពួកគេឈរជើងប្រចាំនៅប៉ុស្តិ៍សង្កេតការណ៍មួយនៃតំបន់ហ្កាហ្សា ហេីយត្រូវក្រុមហាម៉ាសចាប់ពង្រត់យកទៅ អំឡុងពេលវាយឆ្មក់លេីទឹកដីអ៉ីស្រាអែល កាលពីថ្ងៃទី៧ ខែតុលា ឆ្នាំ ២០២៣។
អ្នកទាំង ៤ត្រូវបាននាំទៅកាន់វេទិកាមួយក្នុងទីក្រុងហ្កាហ្សា នៅចំពោះមុខប្រជាជនប៉ាឡេស្ទីនដ៏ច្រើនកុះករ និងឡោមព័ទ្ធដោយក្រុមប្រដាប់អាវុធហាម៉ាសជាច្រេីន។ បន្ទាប់មក ពួកគេត្រូវបាននាំចូលទៅក្នុងរថយន្តកាកបាទក្រហមអន្តរជាតិ (ICRC) រួចបញ្ជូនទៅឱ្យកងកម្លាំងអ៉ីស្រាអែល។ បេីតាមក្រសួងសុខាភិបាលអ៉ីស្រាអែល ពួកគេនឹងបានជួបជុំក្រុមគ្រួសារវិញក្នុងពេលឆាប់ៗ ហើយនឹងត្រូវបញ្ជូនទៅកាន់មន្ទីរពេទ្យនៅភាគកណ្តាលអ៉ីស្រាអែល។
ក្រុមហាម៉ាសនិយាយថា អ្នកទោស២០០នាក់ក៏នឹងត្រូវដោះលែង នាថ្ងៃសៅរ៍នេះដែរ។ ពួកគេរាប់បញ្ចូលទាំងជនសកម្មប្រយុទ្ធដែលត្រូវបានកាត់ទោសឱ្យជាប់ពន្ធនាគារអស់មួយជីវិត ចំពោះការជាប់ពាក់ព័ន្ធរបស់ពួកគេក្នុងការវាយប្រហារសម្លាប់មនុស្សរាប់សិបនាក់។
គួរបញ្ជាក់ថា នេះគឺជាការដោះដូរគ្នាលើកទីពីរ ចាប់តាំងពីបទឈប់បាញ់រវាងអ៉ីស្រាអែល និងក្រុមហាម៉ាសចូលជាធរមាននៅថ្ងៃទី១៩ ខែមករា។ ក្រុមហាម៉ាស់បានប្រគល់ជនស៉ីវិលជាស្ត្រីជនជាតិអ៉ីស្រាអែល ៣នាក់ជាថ្នូរនឹងអ្នកទោសប៉ាឡេស្ទីនចំនួន ៩០នាក់រួចហេីយ៕
