(តេអេរ៉ង់)៖ មេដឹកនាំកំពូលអ៊ីរ៉ង់លោក Ayatollah Ali Khamenei នៅថ្ងៃពុធនេះ បានអំពាវនាវឲ្យមានការពង្រឹងសមត្ថភាពយោធារបស់ប្រទេសបន្ថែមទៀត ដោយលើកឡើងពីតម្រូវការក្នុងការបង្កើនសមត្ថភាពការពារជាតិ ចំពេលមានភាពតានតឹងកើនឡើងជាមួយសហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។
លោក Khamenei បានថ្លែងក្នុងអំឡុងពេលទស្សនកិច្ច នៅឯពិព័រណ៍មួយដែលបង្ហាញពីសមិទ្ធផលចុងក្រោយបង្អស់របស់អ៊ីរ៉ង់ ក្នុងវិស័យការពារជាតិថា «វឌ្ឍនភាព (ផ្នែកយោធា) មិនគួរត្រូវបានបញ្ឈប់ទេ»។ លោកបានសង្កត់ធ្ងន់ថា អ៊ីរ៉ង់មិនគួរស្កប់ចិត្តនឹងសមត្ថភាពបច្ចុប្បន្នរបស់ខ្លួនឡើយ ហើយសូម្បីតែដែនកំណត់ពីមុនលើភាពត្រឹមត្រូវនៃមីស៊ីលក៏លែងគ្រប់គ្រាន់ទៀតដែរ។
គួរបញ្ជាក់ថា ការលើកឡើងរបស់មេដឹកនាំកំពូលរូបនេះ ធ្វើឡើងបន្ទាប់ពីរដ្ឋបាលអាមេរិកដែលដឹកនាំ ដោយលោកប្រធានាធិបតី ដូណាល់ ត្រាំ កាលពីពេលថ្មីៗនេះ បានដាក់ចេញនូវគោលនយោបាយ «ដាក់សម្ពាធជាអតិបរមា» ឡើងវិញលើទីក្រុងតេអេរ៉ង់ ដោយរួមមានការដាក់ទណ្ឌកម្មថ្មីៗ និងការប៉ុនប៉ងរារាំងការនាំចេញប្រេងរបស់អ៊ីរ៉ង់៕
