(កៀវ)៖ អភិបាល​ក្រុង Kharkiv លោក Oleh Syniehubov បាន​និយាយថា កងទ័ព​រុស្ស៉ី​បាន​ធ្វើ​ការ​វាយ​ប្រហារ​ទ្រង់ទ្រាយ​ធំ ​កាលពី​យប់​ថ្ងៃ​ព្រហស្បតិ៍ មកលើ​ទីតាំង​ថាមពល​ក្នុង​តំបន់ ដែលស្ថិតនៅភាគ​ឦសាន​អ៊ុយក្រែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៨ ខែកុម្ភៈ ឆ្នាំ ២០២៥។

លោក Syniehubov បានឱ្យដឹងតាមបណ្តាញតេឡេក្រាមថា កងកម្លាំងការពារដែនអាកាសបានចូលរួមយ៉ាងសកម្ម ដើម្បីទប់ទល់នឹងការវាយប្រហារ ហើយសេវាសង្គ្រោះបន្ទាន់គឺប្រចាំនៅកន្លែងកើតហេតុតែម្តង។ មានបុរសម្នាក់រងរបួសក្នុងតំបន់ Balakliya ភាគអាគ្នេយ៍នៃទីក្រុង Kharkiv។

លោក Syniehubov បានផ្តល់​ព័ត៌មាន​​តិចតួច​ប៉ុណ្ណោះ អំពីទីតាំងដែលរងការវាយប្រហារ​ ហើយ​ប្រាប់ពលរដ្ឋ​មិនឱ្យ​បញ្ចេញ​ព័ត៌មាន។ រីឯ កងទ័ពអាកាសអ៊ុយក្រែន បានរាយការណ៍ពីការគំរាមកំហែងវាយប្រហារ ដោយគ្រាប់បែកកំណត់គោលដៅ និងយន្តហោះដ្រូននៅក្នុងផ្នែកផ្សេងៗនៃតំបន់។

គួរបញ្ជាក់ថា Kharkiv ជាទីក្រុងធំទីពីររបស់អ៊ុយក្រែន ហើយបានទប់ទល់នឹងការព្យាយាមចាប់យកពីសំណាក់កងកម្លាំងរុស្ស៉ី នៅដំណាក់កាលដំបូងនៃសង្រ្គាម៕