(ប៉េកាំង)៖ ប្រធានាធិបតីចិនលោក Xi Jinping បានថ្លែងថា ប្រទេសចិននិងរុស្ស៊ី ត្រូវបន្តពង្រឹងសាមគ្គីភាពក្នុងកិច្ចសហប្រតិបត្តិការអន្តរជាតិ និងតំបន់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។
លោក Xi បានថ្លែងបែបនេះ ក្នុងជំនួបជាមួយលោក Sergei Shoigu លេខាធិការក្រុមប្រឹក្សាសន្តិសុខរុស្ស៊ី ក្នុងទីក្រុងប៉េកាំងកាលពីថ្ងៃសុក្រ។
នាឱកាសនោះ លោក Xi បានសង្កត់ធ្ងន់ពីសារៈសំខាន់នៃការរក្សាទំនាក់ទំនងជិតស្និទ្ធរវាងប្រទេសទាំងពីរនៅគ្រប់កម្រិត ដោយបន្ថែមថា ចិននិងរុស្ស៊ីនឹងដើរតួនាទីនាំមុខគេក្នុង «របៀបវារៈសំខាន់ៗជាបន្តបន្ទាប់»។
គួរបញ្ជាក់ថា ក្នុងជំនួបដាច់ដោយឡែកមួយជាមួយលោក Shoigu កាលពីថ្ងៃសុក្រដដែល រដ្ឋមន្ត្រីការបរទេសចិនលោក Wang Yi បានបញ្ជាក់ថា ទំនាក់ទំនងចិន-រុស្ស៊ី នឹងនៅតែ «រឹងមាំនិងមិនអាចរង្គោះរង្គើបាន»៕
