(ស៉ីដនី)៖ នាយករដ្ឋមន្ត្រី លោក Anthony Albanese បាននិយាយនៅថ្ងៃពុធ ទី១២ ខែមីនានេះថា អូស្ត្រាលីនឹងមិនដាក់ពន្ធគយទៅលើសហរដ្ឋអាមេរិកវិញនោះទេ បន្ទាប់ពីលោកប្រធានាធិបតី ដូណាល់ ត្រាំ ច្រានចោលគំនិតលើកលែង ឬបន្ធូបន្ថយចំពោះប្រទេសទាំងអស់ ពីការដាក់ពន្ធដែកថែប និងអាលុយមីញ៉ូម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក ត្រាំ ធ្លាប់និយាយថា អាចពិចារណាលើកលែងចំពោះអូស្ត្រាលី ដោយមើលឃើញពីអតិរេកពាណិជ្ជកម្មប្រចាំឆ្នាំ របស់សហរដ្ឋអាមេរិកជាមួយប្រទេសនេះ។ យ៉ាងនេះក្តី កាលពីថ្ងៃអង្គារសប្តាហ៍ សេតវិមានបានប្រកាសថា ពន្ធ ២៥ភាគរយដែលបានគ្រោងទុកកាលពីមុន ទៅលើផលិតផលដែក និងអាលុយមីញ៉ូម ដែលនាំចូលមកក្នុងសហរដ្ឋអាមេរិកពីគ្រប់ប្រទេសទាំងអស់ ត្រូវចូលជាធរមាននៅថ្ងៃពុធនេះ។

លោក Albanese គូសបញ្ជាក់ថា «ការសម្រេចចិត្តរបស់រដ្ឋបាលលោក ត្រាំ គឺមិនសមហេតុផលទាំងស្រុង ហើយប្រឆាំងនឹងស្មារតីនៃមិត្តភាពយូរអង្វែង និងជាមូលដ្ឋានរបស់ប្រទេសទាំងពីរ ផ្ទុយនឹងផលប្រយោជន៍នៃភាពជាដៃគូសេដ្ឋកិច្ចរបស់យើង»។

ប៉ុន្តែលោកនិយាយ​ថា «ការ​ដាក់​ពន្ធ​ឆ្លើយតបទៅលើ​អាមេរិក​វិញ អាចត្រឹមតែ​ធ្វើឱ្យតម្លៃ​សម្រាប់​អ្នកប្រើប្រាស់​អូស្ត្រាលីកើនឡើង និង​ជំរុញ​អតិផរណា​ប៉ុណ្ណោះ​។ អ្នកដែលរងគ្រោះ គឺជាអ្នកប្រើប្រាស់»។ តាមលោក Albanese អូស្រ្តាលីនឹងបន្ត​បញ្ចុះបញ្ចូល​រដ្ឋបាល​អាមេរិកឱ្យ​​បន្ធូរបន្ថយ ហើយរូបលោកកំពុងស្នើ ឱ្យមានការជជែកគ្នាតាមទូរស័ព្ទជាមួយ លោក ត្រាំ តែមិនធ្វើដំណើរទៅសហរដ្ឋអាមេរិកនោះទេ៕