(អូតាវ៉ា)៖ មន្ត្រីកាណាដាម្នាក់បាននិយាយថា ប្រទេសកាណាដានឹងប្រកាសដាក់ពន្ធសងសឹកលើទំនិញរបស់សហរដ្ឋអាមេរិក ដែលមានតម្លៃរហូតដល់ ២៩.៨ ពាន់លានដុល្លារកាណាដា (C$) នៅថ្ងៃពុធនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ចំណាត់ការនេះជាការឆ្លើយតបទៅនឹង ការសម្រេចចិត្តរបស់ប្រធានាធិបតីអាមេរិក លោក ដូណាល់ ត្រាំ ក្នុងការដំឡើងពន្ធលើការនាំចូលដែកថែប និងអាលុយមីញ៉ូមពីកាណាដា។
ពន្ធថ្មីរបស់លោក ត្រាំ លើការនាំចូលដែកថែប និងអាលុយមីញ៉ូមបានចូលជាធរមាននៅថ្ងៃពុធនេះ បន្ទាប់ពីការលើកលែងពន្ធ កូតាគ្មានពន្ធ និងការលើកលែងផលិតផលមួយចំនួន បានផុតសុពលភាព។ ការសម្រេចចិត្តនេះជាផ្នែកមួយនៃយុទ្ធនាការរបស់លោក ត្រាំ ក្នុងការរៀបចំឡើងវិញនូវបទដ្ឋានពាណិជ្ជកម្មសកលដើម្បីផលប្រយោជន៍សហរដ្ឋអាមេរិក។ កាណាដាគឺជាអ្នកផ្គត់ផ្គង់ដែកថែប និងអាលុយមីញ៉ូមដ៏ធំបំផុតរបស់បរទេសដល់សហរដ្ឋអាមេរិក។
គួរបញ្ជាក់ថា ភាពតានតឹងផ្នែកពាណិជ្ជកម្មរវាងប្រទេសទាំងពីរ កើតឡើងស្របពេលដែលនាយករដ្ឋមន្ត្រី Justin Trudeau កំពុងរៀបចំប្រគល់តំណែងឲ្យលោក Mark Carney ដែលទើបនឹងឈ្នះការបោះឆ្នោតជ្រើសរើសមេដឹកនាំគណបក្សសេរីនិយមកាន់អំណាចកាលពីថ្ងៃអាទិត្យ។ កាលពីថ្ងៃចន្ទ លោក Carney បានបញ្ជាក់ថា លោកមិនអាចពិភាក្សាជាមួយលោក ត្រាំ បានទេ រហូតទាល់តែលោកចូលកាន់តំណែងជានាយករដ្ឋមន្ត្រីជាផ្លូវការ៕
