(ព្រុចសែល)៖ ប្រទេសលីទុយអានី បានគាំទ្រផែនការរបស់សហភាពអឺរ៉ុប (EU) ដើម្បីផ្តល់ជំនួយយោធា ៤០ពាន់លានអឺរ៉ូ ឬ ៤៣.៥ពាន់លានដុល្លារសម្រាប់អ៊ុយក្រែន នៅឆ្នាំនេះ ហើយថាចំនួនស្រដៀងគ្នានេះក៏នឹងមានតម្រូវការផងដែរ នៅប៉ុន្មានឆ្នាំខាងមុខ ដើម្បីទប់ស្កាត់ការវាយប្រហារណាមួយរបស់រុស្ស៉ី នាពេលអនាគត។ នេះបេីយោងតាមការចេញផ្សាយដោយទីភ្នាក់ងាសារព័ត៌មាន Reuters នៅថ្ងៃចន្ទ ទី១៧ ខែមីនា ឆ្នាំ ២០២៥។
រដ្ឋមន្រ្តីការបរទេសលីទុយអានី លោក Kestutis Budrys បានប្រាប់ Reuters ថា «បើយើងអាចរក្សាចំនួននេះ សម្រាប់រយៈពេលវែង វានឹងអនុញ្ញាតឱ្យអ៊ុយក្រែនរក្សាសមត្ថភាពកងកម្លាំងប្រដាប់អាវុធរបស់ពួកគេបានដូចបច្ចុប្បន្ន»។
ស្របពេលប្រទេសមួយចំនួនក្នុងប្លុក បានឆ្លើយតបយ៉ាងប្រុងប្រយ័ត្នចំពោះគំនិតផ្តួចផ្តើមនេះ លោក Budrys និយាយថា ការគាំទ្រផ្នែកយោធារយៈពេលវែងសម្រាប់អ៊ុយក្រែន មិនចាំបាច់ទាល់តែចេញលទ្ធផលនៃកិច្ចចរចាសន្តិភាពទេ ច្បាស់ណាស់ទីក្រុងកៀវត្រូវការកងកម្លាំងប្រដាប់អាវុធខ្លាំង ដេីម្បីរារាំងរុស្ស៊ីមិនឱ្យត្រឡប់មកជាថ្មី។
គួរបញ្ជាក់ថា លីទុយអានី ស្ថិតក្នុងចំណោមអ្នកគាំទ្រដ៏រឹងមាំបំផុតរបស់អ៊ុយក្រែន ចាប់តាំងពីមានសង្រ្គាមឈ្លានពានរបស់រុស្ស៉ីនៅឆ្នាំ ២០២២ ហើយស្ថិតក្នុងចំណោមអ្នកចំណាយផ្នែកការពារជាតិកំពូលរបស់អឺរ៉ុប។ ការកត់សម្គាល់របស់លោក Budrys នេះបានធ្វេីឡេីងមុនកិច្ចប្រជុំរដ្ឋមន្ត្រីការបរទេស EU ដែលគ្រោងពិភាក្សាលេីសំណេីដែលដាក់ចេញ ដោយសេវាការទូតរបស់ប្លុក៕
