(ព្រុចសែល)៖ អ៉ីតាលី និងអេស្ប៉ាញ បានបញ្ជាក់យ៉ាងច្បាស់ថាមិនទាន់ត្រៀមខ្លួន ដើម្បីគាំទ្រផែនការរបស់សហភាពអឺរ៉ុប (EU) ក្នុងការផ្តល់ជំនួយយោធាចំនួន ៤០ពាន់លានអឺរ៉ូ ឬ ៤៣.៦៧លានដុល្លារដល់អ៊ុយក្រែន នៅឆ្នាំ ២០២៥នេះទេ ហើយថាការរួមចំណែករបស់ប្រទេសនីមួយៗគឺផ្អែកលើទំហំនៃសេដ្ឋកិច្ច។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៨ ខែមីនា ឆ្នាំ ២០២៥។

មុនកិច្ចប្រជុំនៅទីក្រុងព្រុចសែល អ៉ីតាលី និងអេស្ប៉ាញ ដែលជាប្រទេសមានសេដ្ឋកិច្ចធំបំផុតលំដាប់ទី ៣ និងទី ៤របស់ EU បាននិយាយថា វាលឿនពេកក្នុងការប្រកាន់ជំហរច្បាស់លាស់ចំពោះផែនការបង្កើនជំនួយ សូម្បីតែ​បារាំង​ក៏​បាន​លើក​ជាសំណួរ​​ដែរ។ លោក Antonio Tajani រដ្ឋមន្ត្រីការបរទេសអ៉ីតាលី និយាយថា «ផែនការនេះនឹងត្រូវពិភាក្សាគ្នាយ៉ាងស៉ីជម្រៅ»។ រីឯរដ្ឋមន្ត្រីការបរទេសអេស្បាញ លោក Jose Manuel Albares និយាយថា «យើងនឹងមានជជែកដេញដោលគ្នា ប៉ុន្តែពេលនេះមិនមានការសម្រេចចិត្តណាមួយទេ»។

គួរបញ្ជាក់ថា ផែនការដែលស្នើឡើងដោយប្រធានគោលនយោបាយការបរទេស EU លោកស្រី Kaja Kallas មានន័យថា ការគាំទ្រផ្នែកយោធារបស់ EU សម្រាប់អ៊ុយក្រែននឹងកើនឡើងទ្វេដង ខណៈដែលប្លុក និងសមាជិករបស់ខ្លួនបានផ្តល់ថវិកា ២០ពាន់លានអឺរ៉ូក្នុងឆ្នាំ ២០២៤។ ផែនការ​នេះ​ ទទួលបានការ​គាំទ្រ​ខ្លាំង​ពី​បណ្តា​ប្រទេស​អឺរ៉ុប​ខាង​ជើង និង​ខាង​កើត។ ប៉ុន្តែភាពច្របូកច្របល់ក្នុងចំណោមប្រទេសនៅអឺរ៉ុបប៉ែកខាងត្បូង ឆ្លុះបញ្ចាំងឱ្យឃើញពីការបែងចែកភូមិសាស្រ្តតំបន់ ដោយប្រទេសដែលនៅជិតរុស្ស៉ី បានផ្តល់ជំនួយដល់អ៊ុយក្រែន ច្រើនជាងប្រទេសដែលនៅឆ្ងាយពីរុស្ស៉ី៕