(វ៉ាស៊ីនតោន)៖ ទីភ្នាក់ងារសន្តិសុខជាតិរបស់សហរដ្ឋអាមេរិកជាច្រើន បានបញ្ឈប់កិច្ចខិតខំប្រឹងប្រែងសម្របសម្រួល ដើម្បីប្រយុទ្ធប្រឆាំងនឹងព័ត៌មានមិនពិត និងការវាយប្រហារតាមអ៊ីនធឺណិតរបស់រុស្ស៊ី ដែលជាការបន្ធូរបន្ថយសម្ពាធលើទីក្រុងម៉ូស្គូ ខណៈដែលរដ្ឋបាលរបស់លោក ដូណាល់ ត្រាំ កំពុងជំរុញឱ្យរុស្ស៊ីបញ្ចប់សង្រ្គាមនៅអ៊ុយក្រែន។ នេះបើយោងតាមការរាយការណ៍ផ្តាច់មុខពី Reuters កាលពីថ្ងៃអង្គារ។
កាលពីឆ្នាំមុន អតីតប្រធានាធិបតីអាមេរិក Joe Biden បានបញ្ជាឱ្យក្រុមសន្តិសុខជាតិរបស់គាត់ បង្កើតក្រុមការងារមួយដើម្បីត្រួតពិនិត្យបញ្ហានេះ ស្របពេលមានការព្រមានពីចារកម្មអាមេរិកថា រុស្ស៊ីកំពុងបង្កើនសង្រ្គាមស្រមោលប្រឆាំងនឹងបណ្តាប្រទេសលោកខាងលិច។ ផែនការនេះត្រូវបានដឹកនាំដោយក្រុមប្រឹក្សាសន្តិសុខជាតិ (NSC) របស់ប្រធានាធិបតី និងភាគីពាក់ព័ន្ធយ៉ាងហោចណាស់ភ្នាក់ងារសន្តិសុខជាតិចំនួនប្រាំពីរដែលធ្វើការជាមួយសម្ព័ន្ធមិត្តអឺរ៉ុប។
ទោះជាយ៉ាងណាក៏ដោយ ចាប់តាំងពីលោក ដូណាល់ ត្រាំ ចូលកាន់តំណែងនៅថ្ងៃទី ២០ ខែមករា ការងារជាច្រើនបានជាប់គាំង ដោយសារកិច្ចប្រជុំទៀងទាត់រវាងក្រុមប្រឹក្សាសន្តិសុខជាតិ និងមន្ត្រីសន្តិសុខជាតិអឺរ៉ុបមិនត្រូវបានរៀបចំ ហើយ NSC ក៏បានបញ្ឈប់កិច្ចខិតខំប្រឹងប្រែងសម្របសម្រួលជាផ្លូវការនៅទូទាំងទីភ្នាក់ងាររបស់សហរដ្ឋអាមេរិក រួមទាំង FBI នាយកដ្ឋានសន្តិសុខមាតុភូមិ និងក្រសួងការបរទេសផងដែរ។
មន្ត្រីមួយចំនួនក្នុងក្រុមការងារបារម្ភថា រដ្ឋបាលត្រាំ កំពុងបន្ទាបបន្ថោកសារៈសំខាន់នៃបញ្ហានេះ ទោះបីជាមានការព្រមានពីភ្នាក់ងារចារកម្មក៏ដោយ។ ការផ្លាស់ប្តូរនេះកើតឡើងបន្ទាប់ពីមានការផ្អាក ឬលុបចោលគម្រោងផ្សេងទៀតដែលទាក់ទងនឹងរុស្ស៊ីដែលផ្តួចផ្តើមដោយរដ្ឋបាលលោក Biden រួមមានការបញ្ឈប់កិច្ចខិតខំប្រឹងប្រែងរបស់ FBI ក្នុងការប្រឆាំងនឹងការជ្រៀតជ្រែកការបោះឆ្នោត និងការរំសាយក្រុមរឹបអូសទ្រព្យសម្បត្តិរបស់មហាសេដ្ឋីរុស្ស៊ី។
សេតវិមានមិនបានបញ្ជាក់ថា តើខ្លួននឹងបង្កើតក្រុមការងារឆ្លងទីភ្នាក់ងារនេះឡើងវិញឬយ៉ាងណានោះទេ ទៅកាន់មន្ត្រីអាជីពដែលធ្លាប់បានចូលរួម។ ទោះជាយ៉ាងណា មន្ត្រីរដ្ឋាភិបាលអង់គ្លេសបានឲ្យដឹងថា ការចែករំលែកព័ត៌មានសម្ងាត់ជាប្រចាំរវាងសហរដ្ឋអាមេរិក និងអង់គ្លេសនៅតែបន្ត។
នៅពេលសួរអំពីការផ្អាកកិច្ចខិតខំប្រឹងប្រែងនេះ សេតវិមានបានបង្វែរសំណួរទៅកាន់ក្រុមប្រឹក្សាសន្តិសុខជាតិ (NSC)។ អ្នកនាំពាក្យ NSC លោក Brian Hughes បាននិយាយថា ខ្លួនកំពុងសម្របសម្រួលជាមួយភ្នាក់ងារពាក់ព័ន្ធដើម្បីវាយតម្លៃ និងរារាំងការគំរាមកំហែងចំពោះប្រជាជនអាមេរិក។ លោកបានរំឭកឡើងវិញនូវការព្រមានរបស់លោក ត្រាំ ថា ការវាយប្រហារណាមួយលើសហរដ្ឋអាមេរិកនឹងត្រូវឆ្លើយតបដោយកម្លាំងខ្លាំងក្លា៕
