(ឡង់ដ៍)៖ អាកាសយានដ្ឋាន Heathrow របស់ចក្រភពអង់គ្លេស ត្រូវបានបិទនៅថ្ងៃសុក្រ បន្ទាប់ពីមានភ្លើងឆេះយ៉ាងសន្ធោសន្ធៅនៅស្ថានីយ៍អគ្គិសនីក្បែរនោះ បានបណ្តាលឱ្យមានការដាច់ចរន្តអគ្គិសនី ដែលរំខានដល់កាលវិភាគហោះហើរនៅទូទាំងពិភពលោក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។
អ្នកពន្លត់អគ្គីភ័យប្រហែល ៧០ នាក់កំពុងព្យាយាមពន្លត់ភ្លើងនៅភាគខាងលិចទីក្រុងឡុងដ៍ ដែលបានបំផ្លាញប្រព័ន្ធថាមពលបម្រុងក្នុងតំបន់ផងដែរ ដែលនាំឱ្យមានការដាច់ភ្លើងដ៏ធំនៅ Heathrow ដែលជាអាកាសយានដ្ឋានមមាញឹកបំផុតនៅអឺរ៉ុប និងជាអាកាសយានដ្ឋានមមាញឹកបំផុតទី ៥ របស់ពិភពលោក។
អណ្តាតភ្លើងពណ៌ទឹកក្រូចដ៏ធំ និងផ្សែងខ្មៅហុយឡើងលើអាកាសកាលពីយប់មិញ មុនពេលក្រុមពន្លត់អគ្គិភ័យគ្រប់គ្រងស្ថានការណ៍បាន។ នៅព្រឹកព្រលឹម ផ្លូវជុំវិញអាកាសយានដ្ឋានដ៏ធំបំផុតរបស់ចក្រភពអង់គ្លេសស្ទើរតែគ្មានមនុស្ស លើកលែងតែអ្នកដំណើរមួយចំនួនដែលដើរចេញជាមួយវ៉ាលី។
កងពន្លត់អគ្គិភ័យបានបញ្ជាក់ថា «អ្នកស៊ើបអង្កេតនឹងចាប់ផ្តើមការស៊ើបអង្កេតរកមូលហេតុនៃអគ្គិភ័យ ហើយយើងនឹងសហការជាមួយដៃគូដើម្បីកាត់បន្ថយការរំខាន និងជួយដល់សហគមន៍ ខណៈមូលហេតុនៃការឆេះមិនទាន់ត្រូវបានគេដឹងនៅឡើយទេ»។
អាកាសយានដ្ឋាន Heathrow ដែលគ្រោងនឹងគ្រប់គ្រងជើងហោះហើរ ១,៣៥១ គ្រឿង និងអ្នកដំណើររហូតដល់ ២៩១,០០០ នាក់នៅថ្ងៃនេះ បានប្រកាសបិទរហូតដល់ពាក់កណ្តាលអធ្រាត្រដោយសារការដាច់ចរន្តអគ្គិសនីទ្រង់ទ្រាយធំ។ អាកាសយានដ្ឋានបានណែនាំអ្នកដំណើរឲ្យនៅឆ្ងាយ និងទាក់ទងក្រុមហ៊ុនអាកាសចរណ៍របស់ពួកគេសម្រាប់ព័ត៌មានថ្មីៗ ហើយបានសម្តែងការសោកស្តាយចំពោះភាពរអាក់រអួលដែលបង្កឡើង។
គួរបញ្ជាក់ថា អគ្គីភ័យនេះត្រូវបានគេរាយការណ៍នៅម៉ោង ១១ យប់ កាលពីថ្ងៃព្រហស្បតិ៍ បានបង្ខំឱ្យយន្តហោះបង្វែរទៅអាកាសយានដ្ឋាននានានៅទូទាំងចក្រភពអង់គ្លេស និងអឺរ៉ុប ខណៈដែលជើងហោះហើរផ្លូវឆ្ងាយជាច្រើនបានត្រឡប់ទៅចំណុចចេញដំណើររបស់ពួកគេវិញ។ រដ្ឋមន្ត្រីក្រសួងថាមពល លោក Ed Miliband បាននិយាយថា ភ្លើង «មហន្តរាយ» បានរារាំងប្រព័ន្ធថាមពលបម្រុងមិនឱ្យដំណើរការ ហើយវិស្វករកំពុងធ្វើការដើម្បីដាក់ពង្រាយយន្តការបម្រុងទីបី៕
