(តូក្យូ)៖ នៅក្នុងសញ្ញានៃការកើនឡើងនៃភាពជាដៃគូក្នុងតំបន់ ឆ្លើយតបទៅនឹងបរិយាកាសពាណិជ្ជកម្មពិភពលោកដែលកំពុងមានភាពតានតឹង កូរ៉េខាងត្បូង ចិន និងជប៉ុន បានប្តេជ្ញាពង្រឹងកិច្ចសហប្រតិបត្តិការពាណិជ្ជកម្មរវាងប្រទេសទាំងបី។ កិច្ចព្រមព្រៀងនេះត្រូវបានធ្វើឡើងក្នុងអំឡុងពេលកិច្ចប្រជុំរដ្ឋមន្ត្រីពាណិជ្ជកម្មលើកដំបូង​ ក្នុងរយៈពេល ៥ ឆ្នាំ ដែលបានធ្វើឡើងនៅថ្ងៃអាទិត្យ ទី៣០ ខែមីនា ឆ្នាំ ២០២៥ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

មហាអំណាចសេដ្ឋកិច្ចទាំងបីនៅអាស៊ីបូព៌ា បានបង្ហាញពីការប្តេជ្ញាចិត្តរួមគ្នាដើម្បីពង្រឹងពាណិជ្ជកម្មក្នុងតំបន់ និងពិភពលោក តាមរយៈការកសាងកិច្ចព្រមព្រៀងពាណិជ្ជកម្មសេរី (FTA) រវាងកូរ៉េខាងត្បូង-ជប៉ុន-ចិន។ ជំហាននេះត្រូវបានគេមើលឃើញថាជាការឆ្លើយតបដោយផ្ទាល់ទៅនឹងគោលនយោបាយពាណិជ្ជកម្មរបស់សហរដ្ឋអាមេរិកក្រោមការដឹកនាំរបស់ប្រធានាធិបតី ដូណាល់​ ត្រាំ ដែលបានដាក់ចេញនូវពន្ធគយថ្មីៗ រួមទាំងពន្ធលើការនាំចូលរថយន្ត ដែលប៉ះពាល់ដល់ប្រទេសនាំចេញសំខាន់ៗនៅអាស៊ី។

រដ្ឋមន្ត្រីក្រសួងពាណិជ្ជកម្មកូរ៉េខាងត្បូង លោក Ahn Duk-geun បានសង្កត់ធ្ងន់លើសារៈសំខាន់នៃការបង្កើនការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលប្រទេសទាំងបីជាភាគីផងដែរ។ លោកបានលើកឡើងថា RCEP នឹងដើរតួនាទីយ៉ាងសំខាន់ក្នុងការបង្កើតក្របខ័ណ្ឌសម្រាប់ការពង្រីកទំនាក់ទំនងពាណិជ្ជកម្មរវាងប្រទេសទាំងបី តាមរយៈការចរចាលើ FTA ត្រីភាគី។

ការប្រជុំនេះធ្វើឡើងបន្ទាប់ពីការប្រកាសរបស់លោក ត្រាំ អំពីការដាក់ពន្ធបន្ថែម ដែលត្រូវបានគេបកស្រាយថាជាការគំរាមកំហែងដល់ភាពជាដៃគូពាណិជ្ជកម្មដែលមានស្រាប់របស់ទីក្រុងវ៉ាស៊ីនតោន។ ទោះបីជាមានភាពស្មុគស្មាញក្នុងទំនាក់ទំនងទ្វេភាគីនាពេលកន្លងមកជុំវិញបញ្ហាប្រវត្តិសាស្រ្ត និងភូមិសាស្ត្រក៏ដោយ ក៏ប្រទេសកូរ៉េខាងត្បូង ចិន និងជប៉ុនដែលជាដៃគូពាណិជ្ជកម្មដ៏សំខាន់របស់សហរដ្ឋអាមេរិក បានយល់ព្រមបន្តកិច្ចសន្ទនា និងគ្រោងនឹងរៀបចំកិច្ចប្រជុំថ្នាក់រដ្ឋមន្ត្រីលើកក្រោយនៅប្រទេសជប៉ុន៕