(មូស្គូ)៖ រុស្ស៊ី នៅថ្ងៃអង្គារនេះ បានថ្កោលទោសយ៉ាងខ្លាំងនូវអ្វីដែលខ្លួនហៅថា «ឱសានវាទ» បន្ទាប់ពីប្រធានាធិបតីអាមេរិក លោក ដូណាល់ ត្រាំ បានគំរាមទម្លាក់គ្រាប់បែកលើប្រទេសអ៊ីរ៉ង់ លុះត្រាតែអ៊ីរ៉ង់យល់ព្រមធ្វើកិច្ចព្រមព្រៀងជាមួយទីក្រុងវ៉ាស៊ីនតោន ជុំវិញកម្មវិធីនុយក្លេអ៊ែររបស់ខ្លួន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។
អនុរដ្ឋមន្ត្រីការបរទេសរុស្ស៊ី លោក Sergei Ryabkov បានប្រាប់កាសែតរុស្ស៊ី «កិច្ចការអន្តរជាតិ» នៅក្នុងបទសម្ភាសន៍មួយថា «ការគំរាមកំហែងពិតជាត្រូវបានគេឮ ហើយឱសានវាទក៏ត្រូវបានគេឮផងដែរ»។ លោកបានបន្ថែមថា «យើងថ្កោលទោសវិធីសាស្ត្របែបនេះ ហើយចាត់ទុកថាមិនសមរម្យ។ យើងមើលឃើញថាវាជាមធ្យោបាយរបស់ (សហរដ្ឋអាមេរិក) ក្នុងការព្យាយាមដាក់ឆន្ទៈរបស់ខ្លួនលើភាគីអ៊ីរ៉ង់»។
គួរកត់សម្គាល់ថា រុស្ស៊ីកន្លងមកកម្ររិះគន់លោក ត្រាំ ខ្លាំងៗណាស់ ហើយប្រធានាធិបតី Vladimir Putin ថែមទាំងបានខិតខំប្រឹងប្រែងពង្រឹងទំនាក់ទំនងជាមួយលោក ដូណាល់ ត្រាំ ទៀតផង ដែលទង្វើនេះបានបង្កឱ្យមានការព្រួយបារម្ភពីសំណាក់អ៊ុយក្រែន និងសម្ព័ន្ធមិត្តអឺរ៉ុបរបស់រុស្ស៊ី។ វិមានក្រឹមឡាំងថែមទាំង បានស្នើឱ្យមានការសម្របសម្រួលរវាងរដ្ឋបាល ត្រាំ និងអ៊ីរ៉ង់ ដែលរុស្ស៊ីបានចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រកាលពីខែមករា។
ក្នុងការថ្លែងសុន្ទរកថាជាលើកដំបូងរបស់លោក ចាប់តាំងពីអ៊ីរ៉ង់បដិសេធការចរចាផ្ទាល់ជាមួយទីក្រុងវ៉ាស៊ីនតោន ប្រធានាធិបតី ដូណាល់ ត្រាំ បានប្រាប់ NBC News កាលពីចុងសប្តាហ៍ថា ទីក្រុងតេអេរ៉ង់អាចប្រឈមមុខនឹងការទម្លាក់គ្រាប់បែក និងពន្ធបន្ថែម ប្រសិនបើខ្លួនមិនឈានដល់កិច្ចព្រមព្រៀងលើកម្មវិធីនុយក្លេអ៊ែររបស់ខ្លួន។ លោក Ryabkov បានចាត់ទុកការអត្ថាធិប្បាយថ្មីៗនេះជា «ការធ្វើឱ្យស្ថានការណ៍កាន់តែស្មុគស្មាញ» ប៉ុណ្ណោះទាក់ទងនឹងប្រទេសអ៊ីរ៉ង់ ដោយព្រមានថា «ផលវិបាកនៃរឿងនេះ ជាពិសេសប្រសិនបើមានការវាយប្រហារលើហេដ្ឋារចនាសម្ព័ន្ធនុយក្លេអ៊ែរ អាចជាមហន្តរាយសម្រាប់តំបន់ទាំងមូល»៕
